23/06/2013 08:32:57

Vota për Parlamentin e Shqipërisë

Lajme çdo minutë

(19:50) Në të gjithë qarkun e Elbasanit janë mbyllur qendrat e votimit, dhe kreu i komisionerëve në çdo QNV po bën transportimin e kutive të votimit drejt QNV – ve, i shoqëruar me një efektiv të Policisë. Lajmin e bëri të ditur Policia e cila bën me dije se “për shkak të vonesës së zgjedhësve të cilët kaluan orarin zyrtar për të votuar, u bë e mundur vonesa e mbylljes së procesit zgjedhor një orë më pas. Paraprakisht në rang qarku edhe pse nuk ka një shifër zyrtar mësohet se kanë shkuar të votojnë në këto zgjedhje rreth 50 përqind e zgjedhësve në të gjithë qarkun. Në Rrethin e Elbasanit ka 326 QV dhe 7 KZAZ, me 97.300 votues. Në rrethin e Librazhdit ka 99 QV dhe 1 KZAZ. Në rrethin e Peqinit ka 52 QV dhe 1 KZAZ, në rrethin e Gramshit 64 QV dhe 1 KZAZ. Ne qarkun e Elbasanit ka 7 Bashki , respektivisht, Elbasan, Librazhd, Gramsh, Peqin, Prrenjas, Cerrik, Belesh. Në këtë Qark në zgjedhjet e 23 Qershorit janë thirrur të votojnë 320.000 shtetas. Qarku i Elbasanit ka 14 deputetë në Parlamentin Shqiptar. Në këtë proces zgjedhor u thirrën për të votuar 320.000 zgjedhës në të gjithë qarkun.


(19:35) Kryetari i Frymës së Re Demokratike, Bamir Topi, shprehu të dielën besimin se vazhdimësia e procesit zgjedhor do të bëhet me korrektësi. "FRD nuk ka anëtarë në grupet e numërimit, por ka vetëm vëzhgues. Duke e konsideruar çdo komision të krijuar nga ligji, si një instrument ligjor që ka detyrimin të japë me korrektësi verdiktin e votës së qytetarëve, ju bëj apel partive politike që në këtë moment ta presin rezultatin me shumë qetësi", tha Topi. Sipas tij, "FRD u paraqit në zgjedhje si një forcë e moderuar, me mjaft cilësi qytetare dhe nuk krijoi absolutisht asnjë incident". "Ne presim sipas të gjitha të dhënave një rezultat jo vetëm në kufijtë e pritshmërisë, por më shumë se aq", tha Topi.


(09:30) Koalicioni i Vëzhguesve Vendor (KVV) konstaton se "klima e votimit të zgjedhjeve të përgjithshme elektorale 2013 ka qënë normale". Në një deklaratë për mediat KVV, duke u mbështetur mbi raportimet e vëzhguesve në terren, bëri të ditur se gjatë proçesit të sotshëm zgjedhor janë vënë re në disa zona zgjedhore probleme në respektimin e proçedurave të votimit, bllokim i votimit në disa qëndra apo probleme me çertifikatat.


(09:11) Mbi 45 për qind e zgjedhëve në qarkun e Gjirokastrës, votuan sot në katër KZAZ, ndërsa 98 për qind e qendrave të votimit tashmë kanë nisur procesin e dorëzimit të materialeve zgjedhore. Afrim Mullaj, përfaqësuesi i KQZ për qarkun e Gjirokastrës, tha sot se në përgjithësi, procesi i votimi ishte i qetë, me përjashtim të dy qendrave të votimit në rrethin e Përmetit. "Fatmirësisht dy incidentet ishin të riparueshme dhe situata u mor në kontroll nga Policia”, tha Mullaj. Pritet të nisë faza e dytë e procesit zgjedhor, ajo e numërimit të votave, dhe në mesnatë, të gjitha KZAZ, pritet të nisin procesin, nënvizoi Mullai.


(09:10) Në zonën zgjedhore nr. 9, që përfshin rrethin e Tropojës, janë mbyllur votimet, ndërsa pjesëmarrja në votime është 57 për qind. "I gjithë procesi i votimeve në këtë rreth nisi dhe përfundoi në mënyrë të qetë dhe pa shkaktuar ndonjë incident të çfarëdo lloji", bëri të ditur sekretari i KZAZ-së nr. 9, Xhevdet Hoxha. Sipas tij, i gjithë procesi zgjedhor ka vijuar normalisht në të gjitha qendrat e votimit. "Qendrat e votimit kanë nisur të sjellin në vendnumërimin e votave kutitë e votimit. Kanë nisur t’i sjellin qendrat e votimit të qytetit, një proces që do të vazhdojë deri pas mesnate, për shkak Në zonën zgjedhore nr. 9 ishin të regjistruar në listat zgjedhore rreth 20800 votues, ndërsa të çelura ishin 50 qendra votimi. Rrethi i Tropojës përfshin 8 njësi administrative, qytetin e Bajram Currit dhe 7 komuna me një popullsi rreth 28 mijë banorë.


(09:06) Procesi i votimit në qarkun e Shkodrës është mbyllur dhe ka filluar përgatitja për transportimin e bazës materiale drejt ZAZ-ve përkatëse. Ora 19.00 ka shënuar mbylljen e procesit të votimit në territorin e Qarkut Shkodër. Sipas informacioneve marrë pranë ZAZ-ve përkatëse, ecuria e procesit në qëndrat e votimit ka shkuar mjaft mirë, ku përpos një normalitetit dhe mirëkuptimit mes subjekteve politike, ajo që duhet vlerësuar është një rritje e përqindjes së votuesve, krahasuar me katër vite më parë.

Siç bëjnë të ditur drejtues të ZAZ-ve, në disa qëndra, sidomos ato të qytetit të Shkodrës, por edhe në komunën Bushat, si rezultat i pranisë dhe kërkesës së qytetarëve për votim, procesi është shtyrë jashtë orarit zyrtar. Aktualisht ka nisur puna për grumbullimin e materialeve zgjedhore, dhe së bashku me kutitë e votimit, po përgatiten të transportohen drejt ZAZ-ve.

Nga sa bëhet e ditur, vonesa më e madhe në mbërritjen e materialeve zgjedhore, pranë qëndrave të numërimit të votave pritet të jetë për ato të ZAZ-së Nr.2, e cila përmbledh komunat e thella malore, si ajo e Shalës, Pultit, Shoshit, Shllakut, distanca me qytetin e Shkodrës varion në 3-4 orë orë, ndërkohë që ato të Postribës dhe Gruemirës, me një distancë më afërt, mund të mbërrijnë më shpejt.


(09:05) Pjesëmarrja në votimet e sotme në qarkun e Korçës, sipas të dhënave paraprake, mësohet të ketë qenë mbi 51 %. Vetëm në qytetin e Korcës, në zgjedhjet e së dielës morën pjesë në votime 34 570 votues, nga 71 435 të regjistruar në listat zgjedhore. Aktualisht, në KZAZ-në Nr.10, në gjimnazin "Themistokli Germenji", të qytetit, kanë dorëzuar kutitë e votimit disa prej qendrave te votimit të komunave si: Komuna Bulgarec, Komuna Morave, Komuna Drenove dhe Komuna Libonik.


(09:04) Ka përfunduar procesi i votimit në zonën zgjedhore nr. 11, që përfshin rrethin e Kukësit. “I gjithë procesi i votimit ka përfunduar pa u shënuar ndonjë incident, ndërsa pjesëmarrja në votime e zgjedhësve arriti në 67 për qind”,- bëri të ditur kryetari i KZAZ-së nr. 11, Dëfrim Korbi. Gjatë gjithë procesit zgjedhor në zonën zgjedhore nr. 11 nuk është shënuar ndonjë incident. Ndërsa pjesëmarrja në votime ishte e njëjtë me pjesëmarrjen në votime të shënuar në zgjedhjet e vitit 2009. Ndërkohë, menjëherë ka nisur transportimi i kutive të votimit drejt KZAZ-së. Në zonën zgjedhore nr. 11 në listat e votimit ishin të regjistruar 41 826 votues në 88 qendra votimi.


(19:03) Në zonën zgjedhore me numër 85 të Bashkisë së Vlorës, nga tre zona që ka kjo njësi administrative, proçesi i votimit është mbyllur me përjashtim të një qendre, ku proçesi po vijon për shkak të pranisë së votuesve. Kryetari i KZAZ, Arben Beqiraj, tha për se, në këtë zonë me 47 qendra votimi dhe 35380 zgjedhës, kanë marrë pjesë mbi 43 përqind e tyre.


(19:02) Disa qendra votimi në fshatra si edhe në 7 bashkitë e qarkut kanë nisur që në orën 19.00 mbylljen e procesit të votimit. Lajmin e bën të ditur Prefekti i Qarkut, Shefqet Deliallisi, i cili deklaroi se “ rreth 30 minuta përpara mbylljes zyrtare të kutive të votimit në rang qarku kanë shkuar të votojnë rreth 50 për qind e zgjedhësve të thërritur për të votuar". Gjithsesi mësohet se “ pjesa më e madhe e Qendrave të Votimit ka nisur proçedurat e mbylljes së kutive dhe vonesa janë shkaktuar për shkak se shumë zgjedhës kanë zgjedhur minutat e fundit për të shkuar për të votuar.


(19:00) Ministrja e Integrimit, Majlinda Bregu, njëkohësisht zëdhënëse e qeverisë, deklaroi të dielën se, "të gjitha sondazhet tona tregojnë se qytetarët shqiptarë sot kanë votuar bindshëm për aleancën "Për punësim, mirëqenie dhe integrim". "Edi Rama sapo doli për të na bindur të gjithëve që është kopja e keqe e vetes së tij. Siç bëri në 2009 dhe në 2011 kur rendte për të thënë se ka fituar dhe vetëm konsolidonte disfatën e tij të thellë. Në 2009 dhe 2011 ishte humbësi më i madh i zgjedhjeve", tha Bregu në një konferencë për shtyp nga selia e PD-së. Ajo u bëri thirrje komisionerëve, vëzhguesve dhe numëruesve të PD-së të mbyllin me sukses ligjërisht këtë proces. "Sot Edi Rama vulosi përfundimisht disfatën e tij të radhës por kësaj here, ju siguroj më të thellën dhe përfundimtaren. Sondazhet tona dhe trendi i votës së qytetarëve sot konfirmojnë fitoren e aleancës sonë. Rama shpresoj ka patur një pritshmëri të mos humbiste ndoshta shumë thellë, por ju siguroj se humbje spektakolare si këtë herë nuk ka përjetuar asnjëherë", tha Bregu.


(14:00) Kryetari i Partisë Socialiste, Edi Rama dhe kryetari i LSI-së, Ilir Meta reaguan sot pas ngjarjes së ndodhur në Laç, ku simpantizanti i LSI-së, Gjin Gjoni humbi jetën, ndërsa mbetën të plagosur kandidati i Partisë Demokratike, Mëhill Fufi dhe një i afërm i kandidatit të PD-së, Kastriot Fufi. Pas ngjarjes, Rama dhe Meta shkuan në vendngjarje nga ku ftuan qytetarët për pjesëmarrje në votime, ndërsa i bënë thirrje policisë së shtetit që të vihet në shërbim të qytetarëve. "Ne jemi këtu për të apeluar për pjesëmarrje në votime. Nuk ka asgjë që e ndryshon fatin e këtyre zgjedhjeve dhe ne jemi të vendosur e të organizuar për të mbrojtur çdo votë. I lutem qytetarëve që të dalin në votim, pasi nuk ka forcë kriminale që të ndalë popullin të vendosë", u shpreh kryetari i PS-së, nga Laçi. Ndërsa, kryetari i LSI-së, Ilir Meta deklaroi se, "Ne jemi për zgjedhje të lira e të ndershme, jemi për të mbrojtur votën e shqiptarëve".


(13:45) Kur kanë kaluar pesë orë nga hapja zyrtare e procesit zgjedhor, situata në kryeqytet karakterizohet nga një normalitet i plotë. Gjatë një vëzhgimi në disa prej qendrave të votimit në Tiranë, vihet re një fluks normal qytetarësh që presin të votojnë. Ndërkaq, sipas anëtarëve të komisioneve në qendrat e votimit, deri në mesditë, numri i votuesve i referohet parametrave të shënuar në proceset e kaluara, deri në këtë orë të ditës. Vlen të theksohet fakti se, kryesisht vihet re një bashkëpunim mes përfaqësuesve të forcave politike në komisionet e qendrave të votimit. Ajo çka bie në sy menjëherë është prania në ambjentet e QV-ve, e një numri të lartë vëzhguesish ndërkombëtarë, vendor, por dhe të vetë subjekteve të përfaqësuara në zgjedhje. Ndërsa orientimi i zgjedhësit për emrat e tyre në lista si dhe vendndodhjen e QV-ve, po mirëfunksionon nëpërmjet grupeve të përcaktuara, nga partitë politike pjesmarrëse në zgjedhje.


(12:30) Situata zgjedhore në qytetin dhe rrethin e Vlorës është mjaft e qetë dhe procesi po zhvillohet normalisht. Kjo tablo pohohet edhe nga drejtues dhe anëtarë të KZAZ-ve dhe të qendrave të votimit. Në KZAZ 85, që i përket Bashkisë së Vlorës, kryetari i saj, Arben Beqiraj, tha për ATSH-në se, “jo vetëm që nuk ka patur asnjë incident, por mund të thuhet se situata është jashtëzakonisht e qetë”. Sipas Beqirajt, nuk ka ende të dhëna për shkallën e pjesëmarrjes, ndërkohë që shumë shpejt pritet të mbërrijnë treguesit e parë. Kjo gjendje pohohet edhe nga drejtues dhe anëtarë të qendrave të votimit 4471 dhe 4471/1, në godinën e Universitetit të Vlorës. Sipas Genti Hamzaraj, anëtar i Komisionit të Qendrës së Votimit 4471, procesi është mjaft i qetë. Në këtë qendër deri në orën 11.25 kishin votuar 220 persona, ose 22 për qind e atyre të regjistruar. Kjo vlerësohet si një shifër mjaft e kënaqshme. Edhe në qendrën e votimit 4471/1, shkalla e pjesëmarrjes në votime llogaritet me përafërsi pak më shumë se 20 për qind e të regjistruarve.


(12:25) Kryetari i Partisë Drejtësi, Integrim dhe Unitet, Shpëtim Idrizi tha të dielën se procesi i votimit duhet të përcjellë energji pozitive për të cilën ne kemi nevojë. Pasi votoi Idirizi tha se, "është një proces që shqiptarët gjithmonë kanë treguar se votojnë si qytetarë evropiane". Ai apeloi qytetarët të mos bëjnë ndarje politike, pasi siç u shpreh Idrizi, ne sot votojmë deri në orën 19.00, pastaj të gjithë jemi qytetarë të një vendi dhe kjo është energjia pozitive që ne duhet të transmetojmë. "Të shkojmë drejt një Shqipërie Evropiane, drejt një qytetërimi, të cilit ne i përkasim prej mijëra vjetësh", deklaroi Idrizi.


(12:00) Vazhdon normalisht votimi në tre zonat e administrimit zgjedhor në bashkinë e Durrësit. Megjithëse nuk ka ende të dhëna zyrtare, numri i votuesve në 207 Qendrat e votimit të bashkisë bregdetare në katër orët e para të votimit është i lartë.

Sipas sekretares së KZAZ nr 24, Dorina Mili, deri në orën 11.15 në 73 QV që përfshin kjo Zonë kanë votuar 4250 zgjedhës, nga 59 mijë votues gjithsej. Në Qendra të veçanta kanë votuar rreth 20 për qind e zgjedhësve, dhe tendenca e pjesmarrjes vjen duke u rritur.Numri i qytetarëve që presin të votojnë në afërsi të QV ka ardhur duke u rritur pas orës 10.00, thanë burimet.

Në zgjedhjet e përgjitshme për Kuvendin e Shqipërisë në qarkun e Durrësit janë ftuar të votojnë afro 319 mijë zgjedhës. Ata kanë në dispozicion 444 Qendra votimi gjithsej, të shpërndara në 16 njësitë administrative vendore të qarkut, sipas një ndarje territoriale në shtatë Zona Zgjedhore. Në bazë të rezultateve të 23 qershorit, qarku bregdetar do të përfaqësohet në Kuvendin e legjislaturës së ardhshme me 13 deputetë gjithsej.


(11:52) Kryetari i Partisë Fryma e Re Demokratike, Bamir Topi i shoqëruar nga bashkëshortja votoi rreth orës 11.50 në qendrën e votimit të vendosur në shkollën 9-vjeçare "Servete Maçi". Topi pas votimit apeloi qytetarët për maturi dhe ftoi ata të ushtrojnë të drejtën e votës, për të ardhmen e tyre dhe të fëmijëve të tyre. "Është një moment që shoqëria shqiptare të vendosi në qetësi", theksoi Topi, ndërsa dënoi incidentin e rëndë të ndodhur në një qendër votimi në Laç, qarku Lezhë.


(11:26) Procesi i votimit po vazhdon normalisht në zonën zgjedhore nr.11 ne Kukes. “Gjatë 3 orëve të para kanë votuar në të gjitha qendrat e votimit rreth 10 për qind e votuesve të regjistruar. Pritet që në orët e mbasdites të vijë duke u rritur numri i votuesve”, thotë anëtari i KZAZ-së, Tomorr Elezi. Sipas tij, pozitiv është fakti se procesi vazhdon normalisht dhe nuk është regjistruar ndonjë incident. “Procesi ka nisur e po vazhdon normalisht në të 3 rrethet e qarkut dhe deri tani nuk është vërejtur ndonjë shqetësim”, thotë zëdhënësi i drejtorisë së policisë së qarkut të Kukësit, Jaho Caushaj. Në zonën zgjedhore nr. 11 janë të regjistruar 41826 votues në 88 qendra votimi.


(11:15) Ambasadori i Delegacionit të Bashkimit Evropian në Tiranë, Ettore Sequi iu bëri thirrje partive politike, militantëve dhe mbështetësve të subjekteve politike të sillen në mënyrë të qetë, pasi procesi i zgjedhjeve në Shqipëri, nënvizoi ai, është i rëndësishëm për demokracinë.

Gjatë vizitës së tij në qendrën e votimit të ngritur praë shkollës 'Bajram Curri', në Tiranë, Sequi vuri theksin në faktin se zgjedhjet duhet të zhvillohen në një atmosferë të qetë dhe se standardet ndërkombëtare dhe ato evropiane e refuzojnë dhunën. "Ne do të vazhdojmë të vëzhgojmë. Unë vetë përsonalisht nuk e përjashtoj mundësinë të shkoj në ato zona që duken më të ndërlikuara", deklaroi Sequi për mediat. Z. Sequi tha se duhen dhënë udhëzimet pikërisht në këtë linjë për të patur një atmosfere të qetë dhe të paqme.


(11:00) Në Qarkun e Tiranës gjatë ruajtjes së Qëndrave të Votimi dhe KZAZ-ve, nuk është evidentuar asnjë incident, në lidhje me proçesin zgjedhor dhe rendin publik në tërësi. Sipas njoftimit të lëshuar nga Policia e Tiranës mësohet se, kur Komisionet e Qëndrave të Votimit filluan veprimet paraprake për çeljen e votimit, punonjësit e policisë, të cilët siguronin objektet e qëndrave të votimit dhe KZAZ-ve, u larguan prej tyre dhe aktualisht janë vendosur pranë Komisariateve, Stacioneve të Policisë apo Vendeve të grumbullimit të punonjësve të policisë, sipas planifikimit të bërë dhe të miratuar nga Komisioni Qëndror i Zgjedhjeve. Ditën e sotme, në orën 18.00’, do të merren në ruajtje nga punonjësit e policisë 18 Vende të Numërimit të Votave, shërbim i cili do të vazhdojë deri në përmbushjen e detyrimeve ligjore nga KZAZ-të.

Në orën 19.00’ të datës 23 Qershor 2013 punonjësit e policisë të planifikuar do të jenë pranë Qëndrave të Votimit në pritje për shoqërimin e Komisionit dhe materialeve zgjedhore nga Qendrat e Votimit për në Vendet e Numërimit të Votave.

Në vijim të njoftimit bëhet me dije, se Në Qarkun e Tiranës, gjatë ruajtjes së Qëndrave të Votimi dhe KZAZ-ve, nuk është evidentuar asnjë incident, në lidhje me proçesin zgjedhor dhe rendin publik në tërësi.


(10:46) 432 qendra votimi do të funksionojnë në Qarkun e Vlorës në zgjedhjet e përgjithshme të 23 qershorit, ku janë thirrur në votim 293169 zgjedhës. Në këtë njësi do të ndahen 12 mandate për deputetë, çka e rendit këtë qark në një nga më të rëndësishmit në shkallë vendi. Në Qarkun e Vlorës funksionojnë 9 Komisione Zonale të Administrimit të Zgjedhjeve (KZAZ), si edhe 9 Vende të Numërimit të Votave (VNV). Një nga njësitë më të rëndësishme në Qarkun e Vlorës, Bashkia e Vlorës, do të funksionojnë respektivisht me 3 KZAZ dhe 3 VNV, me rreth 102 mijë zgjedhës. Prej muajit janar, kur u afishuan listat dhe deri në 18 maj, që ishte afati ligjor i verifikimit të tyre, u pastruan 400 dublime emrash. Për zgjedhjet e të dielës, në qytetin e Vlorës do të funksionojnë 143 qendra votimi, ose pothuajse 2 herë më shumë krahasuar me zgjedhjet lokale të 8 majit të vitit 2011. Vetëm dy qendra votimi janë instaluar në mjedise private me miratimin e KQZ-së.
Ndërkohë, policia lokale ka marrë masat për ruajtjen sipas ligjit, të godinave ku janë vendosur KZAZ-të dhe VNV.


(10:30) Kryeministri Sali Berisha së bashku me zonjën Liri Berisha votuan sot në Qendrën e Votimit 1729, të vendosur tek “Liceu Artistik”. Pas votimit kreu i qeverisë theksoi se, “ Votova 44. Ishte një ndjenjë kënaqësie që më pushtoi e pandjerë më parë. Ftoj shqiptarët të votojnë në mënyrë masive, në mënyrë të qytetëruar. Të votojnë për alternativën që e konsiderojnë më të mirën. I siguroj se vota e tyre do të respektohet plotësisht. Këto zgjedhje janë përcaktuese për mirëqenien e tyre, punësimin e tyre dhe integrimin në BE”. “Ftoj më së pari ata që votojnë për herë të parë. Ata sot firmosin me votën e tyre Shqipërinë e 4 viteve që vijnë. Falenderoj me mirënjohjen më të thellë emigrantët shqptarë që kanë ardhur nga të 4 anët e botës me një akt patriotizmi. Falenderoj të gjithë të rejat, të rinjtë, qytetarët e këtij vendi, të moshuarit, për aktin që kryejnë sot”, u shpreh Kryeministri Berisha.
“Mesazhi im është thirrja për çdo anëtar, simpatizant, mbështetës të PD, thrirrja për çdo qytetar, ta shndërrojmë këtë në një ditë feste, mirëkuptimi”, tha Berisha.


(10:25) Presidenti i Republikës, Bujar Nishani i shoqëruar nga bashkëshortja znj. Odeta Nishani si dhe djali i tij, i cili voton në zgjedhjet e 23 qershorit për herë të parë, votuan rreth orës 10.18 në Qendrën e Votimit 1766/2 në shkollën e mesme "Andon Zako Cajupi" në Tiranë. Menjëherë pas votimit, Presidenti Nishani i bëri apel qytetarëve të vendit të votojnë dhe të tregojnë, maturi, qetësi dhe përgjegjësi civile, duke respektuar procesin e votimit, rregullat, komisionerët dhe administratorët e procesit, që siç theksoi ai, kanë detyrën më kryesore në këtë proces.


(10:15) Në zonën zgjedhore nr. 10 që përfshin rrethin e Hasit, i gjithë procesi i votimit vazhdon normalisht dhe me mirëkuptim të të gjitha palëve. “Gjithcka vazhdon normalisht dhe deri tani kane votuar 15 për qind e zgjedhesve të regjistruar”, thotë kryetari i KZAZ-së nr. 10 Sahit Jaku. Në zonën zgjedhore nr. 10 marrin pjesë në votime 13600 votues, nderkohe qe janë hapur 31 qendra votimi gjithsej.


(10:00) Kryetari i Bashkisë së Kryeqytetit, Lulzim Basha, pasi votoi në qendrën e votimit të vendosur në çerdhen nr 13, uroi të mbahet një proces zgjedhor, me po aq shpirt civil, siç u zhvillua edhe fushata zgjedhore. “Ky është procesi më i rëndësishëm sa i përket vazhdimit të veprave të mira në shërbim të qytetarit”, vlerësoi Basha para gazetarëve. Gjithashtu ai i bëri thirrje çdo pjestari në këtë proces, komisioner apo vëzhgues, të zhvillojnë një administrim të procesit zgjedhor në përputhje me Kushtetutën. Pasi apeloi për pjesmarrje në votime, Basha deklaroi se “integrimi europian duhet të jetë mbi çdo interes tjetër”.


(09:25) Policia e Shtetit ka marrë një sërë masash për ruajtjen e rendit dhe sigurisë në këtë ditë zgjedhjesh. Janë angazhuar 6 200 policë për të siguruar mbarëvajtjen e procesit në 5509 Qendrat e Votimit. Në një konferencë për shtyp, ditën e djeshme Kreu i Policisë së Shtetit, Hysni Burgaj, ka theksuar se strukturat e Policisë së Shtetit do të bëjnë të mundur ruajtjen e rendit dhe qetësisë ditën e votimit.

Ndërkohë, objektet Shtetërore dhe ato të trupit diplomatik do të ruhen nga efektivat e Forcave Komando dhe Forcave të tjera të Ushtrisë. Kjo në bazë të urdhërit të nxjerrë nga Drejtori i Përgjithshëm i Policisë së Shtetit, në kuadër të masave për garantimin e mbarëvajtjes së procesit zgjedhor.

Sipas policisë së shtetit, dorëzimi i objekteve nga Drejtoritë e Policisë në Qarqe dhe Komisariatet e Policisë në Rrethe dhe marrja në ruajtje nga strukturat e forcave të armatosura do të bëhet deri në datën 25 qershor.


(09:15) Per zgjedhjet parlamentare te se dieles, qarku Shkodër do të ketë 250, 803 votues, nga 350 mijë banorë që ka ky qark. Në garë janë 11 deputetë të këtij qarku dhe 66 forca politike. Në Qarkun Shkodër do të funksionojnë 438 qëndra votimi të ndara në 33 njesitë vendore.

Qarku Shkodër ka 8 KZAZ, 3 në Bashkisë Shkodër, 3 Nënshkodra dhe komunat malore të rrethit Shkodër, 1 një në Malësi të Madhe, 1 në rrethin e Pukës.

KZAZ 1- Malesia e Madhe, 79 qëndra votimi me 41.034 votues
KZAZ 2- Zona e Dukagjinit, 55 qëndra votimi me 32.124 votues
KZAZ 3- Bushati e Vau Dejes, 49 qëndra votimi me 34.639 votues
KZAZ 4- Nenshkoder, 58 qëndra votimi me 33.562 votues
KZAZ- 5 Shkoder Bashkia Shkodër, 45 qendra votimi me 29.724 votues
KZAZ-6 Shkoder Bashkia Shkodër, 44 qëndra votimi me 29.472 votues
KZAZ- 7 Shkoder Bashki, 45 qëndra votimi me 28.820 votues
KZAZ- 8 Pukë, 42 qëndra votimi me 21.428 votues /a.ke/


(09:11) Rreth 130 mijë zgjedhës në qarkun e Gjirokastrës do të votojnë te dielen për zgjedhjet parlamentare. Në jug të vendit janë ngritur katër Komisione Zonale Administrative Zgjedhore (KZAZ), 77, 78, 79 e 80, përkatësisht në Tepelenë, Gjirokastër, Libohove dhe Përmet. KZAZ-ja nr. 77 do të administroje 63 qendra votimi (QV), KZAZ-ja nr. 78 dhe 79 (Gjirokastër-Libohove) do të administroje 120 QV, ndërsa KZAZ nr. 80 do të administroje 54 QV. Ne rrethin e Tepelenës do te votojnë 31160 zgjedhes, në Përmet 62982, ndërsa në Gjirokastër 68640 votues.


(09:10) Ne qarkun juglindor te vendit, ate te Korçes, per zgjedhjet parlamentare te 23 qershorit do te votojne 303.947 zgjedhes. Ne shkalle qarku funksionojne 8 KZAZ. Prej tyre, 3 KZAZ do te jenë në Korçë, 1 në Maliq, 2 në Pogradec, 1 në Bilisht dhe 1 në Ersekë.

Tre KZAZ-të e Korçës jane me numrat 70, 71 dhe 72. KZAZ-ja nr. 70 perfshin 3 komuna, ka gjithsej 48 qëndra votimi, ndersa në listat zgjedhore ka 29 560 votues. Kjo KZAZ perfshin Komunen Qëndër Korçë (17 qëndra votimi dhe gjithsej 10 569 votues), Komunen Drenovë (15 qëndra votimi dhe gjithsej 8549 votues) dhe Komunen Libonik (16 qëndra votimi dhe gjithsej 10442 votues).

KZAZ-ja nr. 71 perfshin Bashkinë Korçë, ku ka gjithsej 101 qëndra votimi, në listat zgjedhore ka 71 435 votues. Ne te përfshihen qëndrat e votimit me nr. nga 3635 deri në 3700/1.

KZAZ-ja nr. 72 përfshin 4 Komuna, ka gjithsej 54 qëndra votimi dhe ne listat zgjedhore ka 32 217 votues. Komunat jane: Komuna Liqenas (8 qëndra votimi dhe gjithsej 4238 votues), Komuna Pojan (21 qëndra votimi dhe gjithsej 13 058 votues), Komuna Vreshtas (13 qëndra votimi dhe gjithsej 7757 votues) dhe Komuna Pirg (12 qëndra votimi dhe gjithsej 7164 votues).

Qarku i Korçës përmbledh 6 bashki dhe 31 komuna me 344 fshatra. Sipas INSTAT (2013) popullsia e këtij qarku është 216,429 banorë, nga të cilët 84,002 banojnë në zonat urbane dhe 132,427 në zonat rurale. Korça zë peshën kryesore me më shumë se 56% të popullsisë, ndjekur nga rrethi i Pogradecit me 25%, Devolli me 12%, dhe Kolonja me 7%. Ky qark do te përfaqësohet në parlamentin shqiptar me 12 deputetë.

(09:08) Forcat e policisë së shtetit kanë dorëzuar një orë më parë shërbimin e ruajtjes së Qendrave të Votimit në qarkun e Durrësit. Zëdhënësja e policisë së qarkut, Ornela Cako, tha se në 443 Qendra votimi në të gjithë qarkun, janë firmosur proces verbalet e marrjes në dorëzim të Qendrave nga komisionet përkatëse, ndërsa QV Nr.1285 në fshatin Tapize të Krujës mbetet ende në ruajtje nga punonjësi i Policisë. Sipas zëdhënëses, në këtë Qendër votimi shumë pranë qytetit të Fushë Krujës komisioni i QV nuk ka filluar ende veprimet paraprake për çeljen e votimit. Në zgjedhjet e përgjitshme për Kuvendin e Shqipërisë në qarkun e Durrësit janë ftuar të votojnë afro 319 mijë zgjedhës. Ata do të kenë në dispozicion 444 Qendra votimi gjithsej, të shpërndara në 16 njësitë administrative vendore të qarkut, sipas një ndarje territoriale në shtatë Zona Zgjedhore.


(09:07) Qarku i Fierit qe ka ne perberje rrethet Fier, Lushnje dhe Mallakastër, ka nje numër të përgjithshëm të votuesve rreth 373 635. Nga këta, 205.860 votues i përkasin rrethit të Fierit, 136.561 rrethit të Lushnjes dhe 31.214 Mallakastrës. Për administrimin e procesit zgjedhor në qarkun e Fierit do të funksionojnë 10 KZAZ të ndara: 5 në Fier, 4 në Lushnje dhe 1 në Mallakastër. Numri i qëndrave të votimit është 575, të cilat janë përcaktuar në përputhje me kriteret e KZ-së. Në rrethin e Fierit do të funksionojnë 296 QV, në rrethin e Lushnjes 224 QV, ndërsa në rrethin e Mallakastrës 55 QV.
Në këtë qark janë caktuar mjediset ku do të instalohen KZAZ dhe QV, të cilat plotësojnë gjithë kriteret, standartet ligjore dhe ato të përcaktuara në KZ.


(09:06) Presidenti Bujar Nishani ka ftuar qytetarët shqiptarë që të marrin pjesë në zgjedhjet e 23 qershorit me seriozitet, përgjegjshmëri dhe përqendrim. Përmes një mesazhi, Presidenti thekson se mosvotimi është një pasivitet i pafalshëm që nuk mund të justifikohet. Ai u ka kujtuar shqiptarëve se ideologjitë dhe partitë janë disa, por vendi dhe e ardhmja e tij, vetëm një.

(09:05) Në qarkun e Elbasanit në orën 07.00 ka nisur procesi i votimeve për zgjedhjet e përgjithshme parlamentare. Procesi i votimit është hapur normalisht në pjesën më të madhe të qarkut të Elbasanit me shqyrtimin e materialeve zgjedhore nga komisionerët dhe me pas ka nisur votimi i qytetarëve. Sipas të dhënave zyrtare nga Inspektori Rajonal për Qarkun e Elbasanit, Dhimitraq Zografi mësohet se "procesi zgjedhor ka nisur normalisht thuajse në të 7 bashkitë dhe 43 komunat e qarkut me përjashtim të disa problemeve që do të zgjidhen në vijim”. Në Qarkun e Elbasanit janë thërritur për të votuar 320 mijë zgjedhës, janë ngritur 541 Qendra Votimi nga 441 që ishin gjatë zgjedhjeve të fundit, si edhe 10 KZAZ dhe QNV, ku pesë prej tyre janë në bashkinë e Elbasanit. Në komisionet e qendrave të votimit anëtarët janë ndarë midis forcave kryesore, ndërkohë që janë angazhuar një numër i madh vëzhguesish partiakë dhe të pavarur, vendas dhe ndërkombëtarë.


(08:50) Presidenti i Republikes Bujar Nishani do të votojë sot për zgjedhjet parlamentare në ora 10:00 në Qendrën e Votimit 1766/2 në shkollën e mesme “Andon Zako Cajupi” në Tiranë. Ndërsa Kryeministri, Sali Berisha do të hedhë votën e tij në 09:45 në Qendrën e Votimit 1729, të vendosur tek “Liceu Artistik”.

Kryetari i Bashkisë së Tiranës, Lulzim Basha pritet të votojë rreth orës 09:30 në qendrën e votimit të vendosur në çerdhen nr 13. Në Qendrën e Votimit numër 1902/2 tek shkolla “Pjetër Budi”, voton rreth orës 10:30 kreu i partisë Socialiste, Edi Rama.

Kryetari i LSI-së voton rreth ores 11:00 në qendrën e votimit pranë “Kopshti numër 10″, tek zona e ish-Bllokut. Ndërsa Kreu i Partisë “Fryma e Re Demokratike”, Bamir Topi votn rreth ores 11:30 në qendrën e votimit të vendosur në shkollën 9-vjeçare “Servete Maçi”.


(08:46) Proçesi zgjedhor i 23 qershorit do të monitorohet nga afër nga rreth 9 mijë vëzhgues, vendas dhe të huaj, që shënon dhe numrin më të madh të vëzhguesve për një proces të tillë në Shqipëri. Sipas të dhënave zyrtare nga KQZ, zgjedhjet e përgjithshme do të ndiqen nga afër nga rreth 8 mijë vëzhgues vendorë dhe rreth një mijë të huaj, të shpërndarë në të 12 qarqet e vendit.

Trupat vëzhguese, pas akreditimit nga KQZ, mund të ndjekin zyrtarisht zhvillimet në ditën e votimeve. Vëzhguesit janë kryesisht përfaqësues nga organizma ndërkombëtarë të specializuara në fushën e zgjedhjeve, nga shoqatat shqiptare të shoqërisë civile, të angazhuara në problematikat e mirëqeverisjes dhe demokratizimit, si dhe nga organizmat ndërkombëtare dhe trupi diplomatik.


(08:43) Në shumë prej Qendrave të Votimit në bashkitë dhe komunat e qarkut të Durrësit proçesi i votimit ka nisur pa probleme, ndërsa ende nuk ka informacion të plotë për situaten ne të gjitha QV në shkallë qarku.

Në disa nga QV e bashkisë së qytetit, ku votimi ka nisur normalisht dhe ku janë paraqitur të gjithë anëtarët e komisioneve përkatëse, ka ende mungesa të vëshguesve, apo të akreditimit të tyre nga institucionet përkatëse.

Në zgjedhjet e përgjitshme për Kuvendin e Shqipërisë në qarkun e Durrësit janë ftuar të votojnë afro 319 mijë zgjedhës. Ata do të kenë në dispozicion 444 Qendra votimi gjithsej, të shpërndara në 16 njësitë administrative vendore të qarkut, sipas një ndarje territoriale në shtatë Zona Zgjedhore.

Në bazë të rezultateve të 23 qershorit, qarku bregdetar do të përfaqësohet në Kuvendin e legjislaturës së ardhshme me 13 deputetë gjithsej.

(08:42) Për zgjedhjet e përgjithshme të 23 qershorit 2013 në Shqipëri do të konkurojnë 66 subjekte zgjedhore, 62 prej të cilave janë grupuar në dy koalicione, një i spektrit të djathtë dhe një i spektrit të majtë.

Me votën e tyre qytetarët shqiptarë do të zgjedhin 140 deputetët e parlamentit të ardhshëm, ku forca politike që do të sigurojë shumicën parlamentare propozon më pas qeverinë që do të drejtojë vendin në katër vitet në vazhdim.

Koalicioni i djathtë "Aleanca për Punësim, Mirëqenie dhe Integrim", i kryesuar nga Partia Demokratike në pushtet grupon 25 parti politike, si më poshtë:

Partia Republikane
Partia për Drejtësi Integrim dhe Unitet
Partia Lëvizja për Zhvillim Kombëtar
Partia Agrare Ambjentaliste
Partia Lidhja Demokristiane
Partia Lëvizja e Legalitetit
Partia Balli Kombëtar
Partia Bashkimi Liberal Demokrat
Partia Aleanca Demokratike Shqiptare
Partia Balli Kombëtar Demokrat
Partia Demokristiane e Shqipërisë
Partia e të Drejtave të Mohuara e Re
Partia Minoriteti Etnik Grek për të Ardhmen
Partia Konsevatore
Partia Ora e Shqipërisë
Partia Bashkimi Demokrat Shqiptar
Partia Aleanca e Maqedonasve për Integrim Europian
Partia Emigracioni Shqiptar
Partia Lëvizja Shqipëria e Re
Partia e të Drejtave të Mohuara
Partia Bashkimi Popullor i Pensionistëve Shqiptarë
Partia Demokracia e Re
Partia Aleanca për Demokraci dhe Solidaritet
Partia Rruga e Vërtetë Shqiptare

Koalicioni "Aleanca për Shqipërinë Europiane", i kryesuar nga Partia Socialiste, përbëhet nga 37 partitë e mëposhtme:

Partia Socialiste e Shqipërisë,
Partia Aleanca Arbnore Kombëtare,
Partia Aleanca për Barazi dhe Drejtësi Europiane,
Partia Ambjentaliste,
Partia Ardhmeria Shqiptare,
Partia Bashkimi Republikan Shqiptar,
Partia Demokrate për Integrim e Prosperitet,
Partia e Çeshtjeve Shqiptare,
Partia e Gjelbë,
Partia e Punës e Shqipërisë,
Partia e Reformave Demokratike Shqiptare,
Partia Unitetit Kombëtar,
Partia G99,
Partia komuniste e Shqipërisë,
Partia Komuniste e Shqipërisë 8-Nëntori,
Partia Kristian Demokrate e Shqipërisë,
Partia Lëvizja Demokratike për Ndryshim,
Partia Lëvizja për Drejtësi e Shqiptarëve,
Partia Mendimi i Djathtë Liberal,
Partia për Mbrojtjen e të Drejtave të Emigrantëve,
Partia Personat me Aftësi të Kufizuar,
Partia Rruga e Lirisë,
Partia Shqiptare Atdheu,
Partia Socialpuntore Shqiptare,
Partia Socialiste e Moderuar,
Partia Socialiste e Vërtetë 91,
Partia Toleranca e Re e Shqipërisë,
Partia Ligji dhe Drejtësi,
Partia Lëvizja Punëtore Shqiptare,
Partia Lëvizja Socialiste për Integrim,
Partia e Bashkimit për të Drejtat e Njeriut,
Partia e Punës së Shqipërisë e Riorganizuar,
Partia Demokracia Sociale,
Partia Social Demokrate,
Partia Aleanca Demokristiane,
Partia Pajtimit Kombëtar,
Partia Aleanca Popullore.


(08:38) Janë hapur të gjitha qendrat e votimit në zonën zgjedhore nr. 10 që përfshin rrethin e Hasit. Sipas kryetarit të KZAZ-së nr. 10, Sahit Jaku, “sipas informacioneve paraprake, procesi i votimit ka nisur qetësisht në të gjitha qendrat e votimit. Deri tani nuk është vërejtur ndonjë mangësi". Në zonën zgjedhore nr. 10 në listat zgjedhore janë të regjistruar 13600 votues. Sot në mëngjes në qytetin e Krumës dhe 32 fshatrat e këtij rrethi jane hapur 31 qendra votimi, prej të cilave vetëm një qendër votimi në lokal privat në fshatin Vranisht.

(08:35) Në orën 07:00 të ditës së dielë u hap zyrtarisht procesi i votimit për zgjedhjet parlamentare 2013 në Republikën e Shqipërise. Sipas Kodit Zgjedhor, qendrat e votimit janë hapur në ora 07.00 dhe do të mbyllen në orën 19.00.

Sipas KQZ-së materialet zgjedhore janë shpërndarë pa probleme në të gjithë vendin dhe komisionet e qendrave të votimit janë të gatshme për të nisur procesin e votimit.

Për këto zgjedhje janë regjistruar 3.271.885 zgjedhës, bazuar mbi të dhënat e regjistrit kombëtar elektronik, ndërsa në të gjithë vendin janë ngritur 5508 qendra votimi. Procesi do të administrohet nga 89 komisionet zonalë të administrimit zgjedhor (KZAZ).

Të regjistruar si subjekte elektoralë janë 66 parti politike, të grupuar në dy koalicione, ndërsa dy parti konkurojnë më vete. "Aleanca për Punësim, Mireqenie dhe Integrim" është koalicioni i djathtë, i drejtuar nga PD, me Kryetar Sali Berishën, njëkohësisht Kryeministër i vendit dhe "Aleanca për Shqipërinë Europiane" i drejtuar nga PS, me kryetar Edi Ramën.


TIRANË - Sot mbahen në Shqipëri zgjedhjet parlamentare të radhës, nga ku do votohet për 140 deputetët e rinj të Kuvendit. Sipas Kodit Zgjedhor, qendrat e votimit do të hapen në orën 07.00 dhe do të mbyllen në orën 19.00.

Për këto zgjedhje janë regjistruar 3.271.885 zgjedhës, bazuar mbi të dhënat e regjistrit kombëtar elektronik, ndërsa në të gjithë vendin janë ngritur 5508 qendra votimi. Procesi do të administrohet nga 89 komisionet zonalë të administrimit zgjedhor (KZAZ).

Për zgjedhjet e reja janë regjistruar si subjekte elektoralë 66 parti politike, të grupuar në dy koalicione, ndërsa dy parti konkurojnë më vete. "Aleanca për Punësim, Mireqenie dhe Integrim" është koalicioni i djathtë, i drejtuar nga PD, me Kryetar Sali Berishën, njëkohësisht Kryeministër i vendit dhe "Aleanca për Shqipërinë Europiane" i drejtuar nga PS, me kryetar Edi Ramën.

HermesNews - ©2013

Dërgo me email | Stampo artikullin