19/06/2013 14:38:49

Internet ndërplanetar me Protokollin Bundle të vizionarit Vint Cerf

NASA ka filluar studimet për krijimin e një protokolli për të shtrirë rrjetin e internetit edhe në hapësirë. Kjo falë idesë së vizionarit Vint Cerf dhe protokollit të tij Bundle

HermesNews - Edhe pse bota nuk ka ende një shtrirje të plotë të rrjetit të internetit, NASA ka filluar studimet për krijimin e një protokolli për të shtrirë rrjetin e internetit edhe në hapësirë. Kjo falë idesë së vizionarit Vint Cerf dhe protokollit të tij Bundle.

Së shpejti udhëtimet në hapësirë do të bëhen realitet. Aktualisht ekziston një projekt për të realizuar një rrjet ndërplanetar, i cili mund të shtrijë lidhjen e internetit edhe në hapësirë. Në ambjentet e specializuara projekti njihet me emrin Protokollo Bundle.

Ideja e këtij projekti la lindur që në vitet ’90, kur Vint Cerf filloi të bashkëpunonte me NASA-n. Vizionari Cerf konsiderohet sot si një nga baballarët themelues të internetit, sepse së bashku me Bob Kahn ka krijuar protokollin TCP/IP që është baza e komunikimit brënda rrjeteve si interneti. Por kësaj here idetë e tij revolucionare shkojne përtej Tokës.


Pra Cerf ka filluar tashmë të krijojë bazat për Disruption Tolerant Protocol, i cili lejon zgjidhjen e disa problemeve lidhur me trasmetimin e të dhënave. Ndryshe nga sa ndodh me rrjetet tokësore, në një rrjet ndërplanetar të dhënat duhet të udhëtojnë për mijëra apo miliona kilometra dhe duhet më shumë kohë për të arritur në destinacion.

Protokollët e deri tanishëm nuk janë në gjendje të kryejnë operacione të tilla duke tejkaluar kufinjtë e atmosferës tokësore. Nga ana tjetër këto lidhje interneti ndërplanetar janë të domosdoshme për të ndjekur pozicionin dhe vendosjen e të gjithë objekteve që lëshohen në hapësirë.

Për të lehtësuar komunikimin, të dhënat që shkëmbehen do të ruhen në memorje për një kohë akoma më të gjatë nga sa ndodh me protokollet e tjera tokësore. Për momentin, nyjet e protokollit për projektin ndërplanetar janë të pakta dhe shtrihen për disa kilometra.

Cerf shpreson që Protokolli Bundle të bëhet së shpejti një standart për komunikimet hapësinore, në mënyrë që të shtrihet edhe më tutje rrjeti dhe numri i nyjeve të përfshira. Për shembull satelitët në orbitën e Tokës mund të kthehen në nyje të internetit ndërplanetar.

Daniela Vathi

Dërgo me email | Stampo artikullin