18/06/2013 20:18:01

10 milion Lekë çdo nivel përfaqësimi në KZQ

Duke tejkaluar bindjet politike dhe propagandën elektorale, edhe pse vetëm 4 ditë para zgjedhjeve, gratë deputete apo kandidate për deputete, apeluan njëzëri për nivel më të lartë përfaqësimi në politikë

TIRANË - Gratë në politikë u mblodhën sot në një tryezë të rrumbullakët, ku disktuan mbi nivelin e përfaqësimit, barazinë gjinore, të drejtat e grave në tërësi dhe sfidat në rrugën e emancipimit të shoqërisë.

Duke tejkaluar bindjet politike dhe propagandën elektorale, edhe pse vetëm 4 ditë para zgjedhjeve, gratë deputete apo kandidate për deputete, apeluan njëzëri për nivel më të lartë përfaqësimi në politikë dhe hapësira më të mëdha në vendimëmarrje.

Mimoza Hajdarmataj, kandidate për deputete e PD-së në Qarkun e Kukësit, duke folur në këtë aktivitet, "vlerësoi rëndësinë e zhvillimit të ekonomisë, infrastrukturës dhe lëvizjes së lirë, si një formë e zhvillimit të gruas, sidomos asaj të zonave rurale".

Ndërsa deputetja socialiste Vasilika Hysi, theksoi se, “sfidë kryesore e gruas është emancipimi i shoqërisë si fillim, për të pranuar gruan si përfaqësuese ndoshta edhe më të denjë e më të drejpërdrejtë se burrat në politikë e kudo".

E pranishme në këtë tryezë, kandidatja për deputete e Lëvizjes Socialste për Integrim, Klajda Gjosha u bëri thirrje grave që, “votën e tyre më 23 qershor, ta hedhin për gratë, si shërbimi më i mirë që mund t’i bëjnë vetes dhe familjes së tyre”.

Gjatë diskutimeve, u cilësua si fyes vendimi i Komisionit Qëndror të Zgjedhjeve, për gjobitje të subjekteve politike që nuk respektuan kriterin e kuotës së përfaqësimit të përcaktuar në Kodin Zgjedhor. Sipas tyre, “çdo grua që mungoi në këto lista, u barazua me 10 milion lekë”, referuar nivelit të gjobave të KQZ-së.

HermesNews - ©2013

Dërgo me email | Stampo artikullin