15/06/2013 16:35:24

Monedha Euro kap majat

Aktorët e tregut vendas pohojnë se arsyeja kryesore e forcimit të euros në tregun vendas lidhet sërish me kërkesën e lartë nga bankat

TIRANE - Në tregun valutor vendas, monedha europiane euro ka arritur këtë fundjavë nivelin më të lartë të këtij viti në kursin e këmbimit me lekun nga blerjet e bankave. Ekspertët shprehen se efekti psikologjik po ndihet dhe nga zgjedhjet, duke e mbajtur lekun në nivele të ulët. Pas një qetësimi në javën e fundit të majit, monedha evropiane ka fituar sërish pikë ndaj lekut, duke u kuotuar të shtunën në nivelin më të lartë të këtij viti, prej 141.44 lekë, sipas kursit zyrtar të këmbimit të Bankës së Shqipërisë. Aktorët e tregut vendas pohojnë se arsyeja kryesore e forcimit të euros në tregun vendas lidhet sërish me kërkesën e lartë nga bankat, që po blejnë për llogari të klientëve të tyre, kryesisht kompanitë celulare. Efekt negativ psikologjik, sipas tyre, po jep dhe situata parazgjedhore, që po e mban lekun të ulët. Sipas tyre pritet që në afatin e shkurtër leku të jetë i dobët. Që nga fillimi i këtij viti, monedha e përbashkët është forcuar me 1.3% ndaj lekut. Mesatarja e kursit për periudhën janar-14 qershor është 140.1 lekë, ndër nivelet më të larta të viteve të fundit. Në tregjet ndërkombëtare, një euro u këmbye të premten me 1.332 lekë, me një rënie të lehtë prej 0.38% në raport me ditën e djeshme.

HermesNews - ©2013

Dërgo me email | Stampo artikullin