15/06/2013 11:25:25

Bankat shqiptare rrisin provigjonet

BSH, kreditë me probleme janë të mbuluara me provigjione në masën 55.4%

TIRANE - Institucioni i mbikëqyrjes së sistemit bankar vendas, Banka Qendrore bën të ditur se ndonëse kreditë e këqija vijuan të rriten edhe në vitin 2012, bankat tregtare kanë rritur më shumë provigjionimet duke ulur kështu riskun e tyre për sistemin. Sipas të dhënave të publikuar së fundi nga BSH-ja, kreditë me probleme ishin të mbuluara me provigjione në masën 55.4%, rreth 4 pikë përqindje më shumë krahasuar me një vit më parë. Ndërkohë edhe mbulimi me kolateral i kredive me probleme është mjaft i lartë, në rreth 80%.

Nga ana tjetër, bankat shfaqen më të konsoliduara edhe falë rritjes së raportit të mjaftueshmërisë së kapitalit që është mbi nivelin minimal rregullator prej 12%, me një rritje të kënaqshme krahasuar me një vit më parë, duke arritur nivelin prej 16.2% nga 15.6% në fund të vitit 2011.

Gjatë prezantimit të Raportit të Mbikëqyrjes për vitin 2012, ekspertë të Bankës së Shqipërisë deklarun se procesi i ekzekutimit të kolateraleve ka vijuar të ecë më shpejt falë përmbaruesve privatë. Rreth 20% të vlerës së kredive të dhëna që konsiderohen të humbura është mundur të arkëtohet nga ekzekutimi i kolateraleve të tyre. Kjo përbën afro 6% të vlerës së të gjithë kredive me probleme.

Shqetësues gjithsesi mbetet niveli i lartë i kredive me probleme, që rritën në 22.5% në fund të 2012-ës. Rritja me ritme më të ulëta e portofolit të kredisë në krahasim me vitet e fundit pati ndikimin e saj strukturor edhe në rritjen e treguesit të kredive me probleme.

Analiza sipas subjektit dhe qëllimit të përdorimit të kredisë evidenton peshën më të madhe të kredisë "overdraft" për bizneset, pasuar nga kredia për "investime për pasuri të paluajtshme", sërish dhënë biznesit, dhe nga kredia për "investime për pasuri të paluajtshme" për individë.

HermesNews - ©2013

Dërgo me email | Stampo artikullin