14/06/2013 21:43:21

Zhvillohet takimi i ministrave te mbrojtjes se Kartes se Adriatik

Në Ohër të Maqedonisë u zhvillua sot Takimi i Ministrave të Mbrojtjes së Kartës së Adriatikut me tematikë “Punojmë së bashku drejt paqes dhe sigurisë globale”

TIRANE - Në Ohër të Maqedonisë u zhvillua sot Takimi i Ministrave të Mbrojtjes së Kartës së Adriatikut, A5 me tematikë “Punojmë së bashku drejt paqes dhe sigurisë globale”.

Zv.ministria e Mbrojtjes Arta Musaraj, u shpreh në fjlaëne saj se “nuk ka asnjë dyshim, se gjatë viteve të fundit, bashkëpunimi midis vendeve anëtare të A5 është zgjeruar duke mbuluar një gamë të gjerë fushash të mbrojtjes dhe sigurisë. Iniciativa e A5 është produkt i një fryme të re të bashkëpunimit dhe gjatë këtyre viteve kemi arritur shumë suksese”.

“Dy vende të kësaj iniciative, Shqipëria dhe Kroacia, janë tashmë anëtarë të NATO dhe tre vende të tjera janë duke punuar shumë që të bëhen pjesë e Aleancës. Në këtë drejtim, Shqipëria ka mbështetur dhe do të mbështesë përpjekjet e vendeve të rajonit, anëtare ose jo anëtare të Kartës së Adriatikut, në rrugën e tyre drejt integrimit në NATO”, tha Musaraj.

Musaraj nënvizoi se, “Shqipëria si një mbështetës i përhershëm i “politikës së dyerve të hapura”, inkurajon të gjithë vendet e rajonit, të cilat kanë akoma probleme të pazgjidhura, që të gjejnë një zgjidhje përfundimtare në frymën e bashkëpunimit dhe të kompromisit”.

Zv.ministria Musaraj theksoi se, “në interes të paqes dhe sigurisë rajonale dhe globale, si vende anëtare të NATO-s apo partnere të saj, ne duhet të vazhdojmë që të kontribuojmë në Afganistan, sidomos me ekipe trajnuese të përbashkëta të Policisë Ushtarake, ekipeve të përbashkëta mjekësore, por edhe duhet të trajtojmë edhe sfidat rajonale me ndikim në vendet tona si: emergjencat civile, trafikimin e qënieve njerëzore, të armëve, lëndëve narkotike, ndotjen e mjedisit, misionet e kërkim-shpëtimit etj”.

Zv.ministrja e Mbrojtjes, Arta Musaraj, ritheksoi edhe njëherë se, “Shqipëria do të vazhdojë të mbështesë iniciativat rajonale, të cilat do të bëjnë të mundur një bashkëpunim më të ngushtë mes vendeve tona. Projektet e përbashkëta rajonale si BRAAD, krijimi i Qendrave Trajnuese Rajonale, i Qendrave Rajonale të Gjuhëve të Huaja, kurset e përbashkëta në fushën e arsimimit ushtarak dhe stërvitjet e përbashkëta duhet të inkurajohen nga të gjitha vendet, në mënyrë që të ruajmë bashkëpunimin tonë rajonal/shumëkombësh si rrugën kryesore të veprimtarisë sonë në të ardhmen”.

Në fund, ministrat e Mbrojtes dhe përfaqësuesit e tjerë të vendeve pjesëmarrëse në iniciativën rajonale të Kartës së Adriatikut që morën pjesë në këtë takim, kanë nënshkruar Delaratën e Përbashkët të Takimit të ministrave të Mbrojtjes së A5.

Në këtë takim, ishin të pranishëm edhe ministri i Mbrojtjes së Maqedonisë, z. Talat Xhaferi, ministri i Mbrojtjes i Bosnje-Hercegovinës, z. Zekerijah Osmic, ministri i Mbrojtjes i Kroacisë, z. Ante Kotromanovic, ndërsa Mali i Zi u përfaqësua nga ambasadori i tij në Shkup, z. Dushan Mrdovic. Gjithashtu në këtë ministerial mori pjesë si i ftuar ministri i Forcës së Sigurisë së Kosovës, z. Agim Çeku.

HermesNews - ©2013

Dërgo me email | Stampo artikullin