06/06/2013 22:08:39

Firenze, gjendet kufoma e shqiptarit

Hetuesit bëjnë me dije se vrasja mund të ketë ndodhur në një makinë afër kazermës, sepse ka pasur gjurmë gjaku tek automjeti

FIRENZE - Trupi i karbonizuar dhe i therur i një personi është gjetur ditën e sotme nga policia italiane. Mësohet se viktima është një shqiptar i zhdukur pak ditë më parë, në datë 31 maj është bërë dhe denoncimi nga të afërmit e të riut. Mësohet se kufoma është gjendur në kazermën “Ujqërit e Toskanës” në Firence, e cila ka vite që është braktisur.

Policia konfirmon se kufoma është djegur, për të fshehur gjurmët e krimit, se nga ekzaminimet që iu bënë doli në përfundimin se në trup kishte plagë të shkaktuara me armë prerëse dhe nuk përjashtohet që viktima, i seksit mashkull, të jetë vrarë dhe më pas t’i jetë vënë flaka.

Nga të dhënat mësohet se vdekja mund të jetë shkaktuar nga prerja e fytit. Ai që e zbuloi trupin ishte një roje i ndërtesës, që periodikisht patrullon zonën.

Hetuesit bëjnë me dije se vrasja mund të ketë ndodhur në një makinë afër kazermës, sepse ka pasur gjurmë gjaku tek automjeti.

Më pas, kufoma është transportuar në ish-strukturën ushtarake dhe është lagur me lëndë djegëse, për ta bërë të vështirë identifikimin. Makina i përket një burri rezident në Milano, në emrin e të cilit figurojnë shumë makina dhe ka të ngjarë të jetë një qiradhënës makinash. Vijojnë hetimet e koordinuara me prokurorin e Firences, Sandro Cutrignelli. //shekulli//

HermesNews - ©2013

Dërgo me email | Stampo artikullin