27/05/2013 11:07:47

50 kg drogë në portin e Durrësit

Droga u gjet e fshehur në një kaldajë, e cila ishte maskuar mes pllakave të gurit që po transportoheshin zyrtarisht

DURRES - Forcat e policisë kufitare kanë sekuestruar mbrëmë një sasi prej afro 50 kg canabis sativa, ndërsa është arrestuar edhe pronari i automjetit, që po nisej me traget për në Itali. Burime zyrtare nga drejtoria e policisë së kufirit dhe migracionit, bënë të ditur se 30-vjeçari Erion Alushi, banues në Durrës, është arrestuar pas kontrolleve në automjetin ku në emër të firmës që ai drejton bashkë me ngarkesën e deklaruar ishin zbuluar 45 pako me një sasi të përgjithshme prej 49.7 kg kanabis sativa e presuar. Burimet shtuan se droga u gjet e fshehur në një kaldajë, e cila ishte maskuar mes pllakave të gurit që po transportoheshin zyrtarisht me kamionin e firmës dhe që drejtohej nga një 54-vjeçar, i cili sipas policisë nuk ka lidhje me transportin e paligjshëm të lëndës narkotike. Hetimet e mëtejshme do të kryhen nga prokuroria e krimeve të rënda, përfunduan burimet e policisë.

HermesNews - ©2013

Dërgo me email | Stampo artikullin