24/05/2013 16:47:21

Legalizimet mbyllen brenda 2013-tës

Pranë Drejtorisë së Përgjithshme të ALUIZNI-it janë rreth 270 mijë vetëdeklarime, nga të cilat 230 mijë janë kualifikuar

TIRANË - Nëndrejtori i Agjencisë së Legalizimeve Gazmend Domi, deklaroi në një intervistë, se po punohet intensivisht për të përmbyllur procesin e legalizimit të ndërtimeve informale brenda këtij viti.

"Është një punë intensive dhe kërkon disa pjesëmarrës në proces, duke qenë se ndërtimet nuk janë me planimetri dhe të studiuara", deklaroi Domi. Por theksoi ai, ky proces po ecën me ritme të shpejta.

Sa i takon vendimit të fundit të qeverisë për përfshirjen në procesin e legalizimeve të ndërtimeve pas vitit 2006, Domi tha se "ky akt normativ i jep një përgjigje të drejtpërdrejt tanimë kësaj problematike. Ne legalizojmë, formalizojmë i kthejmë tregut me mijëra shtëpi të shqiptarëve, mundin dhe djersën e tyre, investimin e tyre".

Z. Domi theksoi se qytetarët duhet të kryejnë shlyerjen e faturave financiare pas kalimit të titujve të pronësisë me vendim qeverie. Këto fonde, sipas tij, do të shërbejnë për urbanizimin e këtyre zonave informale. "Rreth 20 % e fondit që merret nga legalizimet shkon për tu riinvestuar në ato zona", theksoi Domi.

Pranë Drejtorisë së Përgjithshme të ALUIZNI-it janë rreth 270 mijë vetëdeklarime, nga të cilat 230 mijë janë kualifikuar. Sipas të dhënave, 95 mijë prej tyre janë në proces të kalimit të pronësisë dhe 74 mijë të tjera kanë marrë tashmë leje legalizimi.

Pak ditë më parë, qeveria miratoi aktin normativ për përfshirjen në procesin e legalizimit të rreth 100 mijë banesave të ndërtuara pas vitit 2006. Domi bëri të ditur se në qershor do të nisë faza e dytë e legalizimeve për ndërtesat pa leje të ndërtuara pas vititi 2006. Ndryshimet në ligjin përkatës janë miratuar në Fletoren Zyrtare dhe hyjnë në fuqi në 3 qershor.

Sipas Domit, punonjësit e ALUIZNI-t do të kthehen në terren për verifikime, pasi bëhet fjalë për rreth 100 mijë ndërtesa informale.

Procesi i legalizimit në vetvete jo vetëm legjitimon, formalizon dhe legalizon pronat, por përmes tij kompensohen ish-pronarët. Tashmë ky proces ecën paralel, pra 20 % u kalon njësive vendore që kanë obligimin ligjor ti investojnë në zonat ku ato janë vjelë dhe 80 % shkon për kompensimin e ish-pronarëve.

HermesNews - ©2013

Dërgo me email | Stampo artikullin