24/05/2013 11:03:48

Të gjithë jemi të dobët...

nga Doriana Metollari

HermesNews - Të gjithë jemi të dobët. Të gjithë jemi të brishtë. Njeriu nuk është kurrë i fortë pa i pranuar kufinjtë e vet por ky sistem ku jetojmë nuk të jep hapësirë nëse nuk dukesh i fortë para të tjerëve. Të marrësh pamjen e njeriu që nuk je. Nuk mund të jesh prind, dhe të mos dukesh i fortë, nuk mund të bësh karrierë pa iu imponuar të tjerëve.

Brezat që do të vijnë shpresoj ta quajnë sistemi kaosi, sepse njeriu ende nuk ka vendosur të jetojë për të qenë në ekuilibër me veten dhe botën rreth tij. Sistemi na mëson se nuk mund të kemi sukses nëse nuk mësojmë të mos i shfaqim dobësitë tona në një shoqëri që mund të përfitojë në çdo sekondë. Kjo është arsyeja që ne rritemi dhe ndjehemi gjithnjë e më të vetmuar.

Liria është dhurata dhe prova më e vështirë që Zoti i bëri njeriut. Mendojmë se e kemi lirinë vetëm atëherë kur ua heqim të tjerëve. Ja kurthi i parë. Jeta jonë nga eksplorim për përsosje kthehet në luftë për ekzistencë që e jetojmë me ankth e depresion. Në këtë vorbull jemi të gjithë.

A mund të dalim nga e gjitha kjo ?

Sikur t'i kisha të gjitha përgjigjet do të isha njeriu më i lumtur në botë. Di që kemi nevojë të gjithë për njeri-tjetrin për t'u plotësuar si njerëz dhe për të jetuar në sintoni me atë çfarë natyra na ka dhënë pa kërkuar asgjë në këmbim.

Jemi ne që e komplikojmë negativisht ekzistencën.

HermesNews - ©2013

Dërgo me email | Stampo artikullin