15/05/2013 10:19:36

Aplikimet e reja OnLine për patentata

Një shërbim që u ofrohej qytetarëve me anë të regjistrave me dorë kalohet në një shërbim 100% të dixhitalizuar

TIRANË - Kryeministri Sali Berisha merr pjesë në përurimin e shërbimit të dytë për qytetarët e-Patenta në portalin unik qeveritar e-Albania.al, si shërbim i Drejtorisë së përgjithshme të shërbimeve të transportit rrugor (DPSHTRR).

Projekti i interoperabilitetit shënon vlerën e €2.6 milionë me financim të komunititet europian dhe DPSHTRR me një investim prej L15 milionë realizoi bllok-skemën llogjike të shërbimit e-Patenta që është zbatuar nga kompania shqiptare Advanced Business Solutions (ABS).

Për realizimin e këtij projekti është bërë përpunimi i të dhënave të lejeve të drejtimit të arkivuara që para viteve 1990 dhe deri në ditën e sotme. Janë marrë dhe përpunuar të gjithë regjistrat ekzistues të mbushura me dorë të viteve të shkuara dhe është bërë dixhitalizimi i dosjeve të afro 634 mijë shtetasve të pajisur me leje drejtimi.

Mbyllet faza e parë e shërbimit e-Patenta, e cila si fillim është e disponueshme për zyrën rajonale të Tiranës dhe brenda muajit Qershor ky shërbim do të përdoret nga qytetarët në të gjithë Shqipërinë. Gjithashtu, brenda 10 ditëve, shërbimit për aplikim për patentë të re, do t’i shtohen edhe tre shërbime të tjera për aplikim për rinovim leje drejtimi, aplikim për zëvendësim leje drejtimi të dëmtuar dhe aplikim për zëvendësim leje drejtimi të humbur.

Si rezultat i përfundimit të këtij projekti, nga një shërbim që u ofrohej qytetarëve me anë të regjistrave me dorë kalohet në një shërbim 100% të dixhitalizuar. Për kryerjen e të gjithë procesit të regjistrimit për tu pajisur me leje drejtimi qytetarët dhe autoshkollat, më parë duhej të humbnin 1 ditë pune, ndërsa tani ky proçes bëhet nga zyra apo shtëpia dhe vetëm për 6 minuta.

HermesNews - ©2013

Dërgo me email | Stampo artikullin