14/05/2013 14:06:29

Demokracia e Re është partia më e preferuar e grekëve

Sondazh nga Fakuteti i Statistikave në Universitetin e Athinës, për llogari të rrjetit televiziv privat Extra

ATHINË - Demokracia e Re (Nd), partia e qendrës së djathtë e kryesuar nga kryeministri Adonis Samaras, konfirmohet si formacioni i parë politik në qendër të preferencave të elektoratit grek, edhe pse me një avantazh minimal prej 0,2 për qind kundrejt partisë së majtë radikale, Syriza, që kryesohet nga Alexis Cipras.

Këto janë rezultatet e një sondazhi të zhvilluar nga Fakuteti i Statistikave në Universitetin e Athinës, për llogari të rrjetit televiziv privat ''Extra'', ku rezulton se Demokracia e Re merr 21,6 për qind të preferencave përkundër 21,4 për qind të Syrizës.

Në vendin e tretë, me 12,4 për qind renditet partia filo-naziste ''Chrysi Avgi'' (Agimi i Artë) e ndjekur nga Pasok (socialistët) me 6,3 për qind dhe Partia Komuniste e Greqisë (Kke) me 6,2 për qind.

Një rritje e lehtë pas ndërrimit të sekretarit të përgjithshëm ka pësuar e Majta Demokratike (DiMar) me 5,1 për qind dhe në fund renditet Partia e grekëve të Pavarur me 4,2 për qind.

Ndërkohë sondazhi është realizuar në periudhën 18 prill - 12 maj të vitit 2013, në nivel kombëtar me rreth 6.093 persona.

HermesNews - ©2013

Dërgo me email | Stampo artikullin