07/05/2013 10:39:02

Banka qëndrore qetëson tregjet

Shëndeti financiar i bankave shqiptare është i sigurt

TIRANE - Banka e Shqipërisë siguron se shëndeti financiar i sistemit bankar është kosisten dhe i qëndrueshëm. Sektori bankar ka regjistruar rezultate pozitive përsa i përket ecurisë së treguesve që matin shëndetin financiar.

Kjo është reflektuar në rritjen e indeksit të fortësisë financiare në fund të vitit 2012, në nivelin 87.1 nga 85.8 që llogaritej një vit më parë. Përmirësimi i shëndetit financiar të bankave u ndikua nga efekti i kombinuar i katër prej nënindekseve që e përbëjnë atë, ai i përfitueshmërisë, i likuiditetit, i mjaftueshmërisë së kapitalit dhe një ekspozim më i ulët ndaj rrezikut të normës së interesit.

Nënindeksi i përfitueshmërisë shënoi një përmirësim të dukshëm gjatë vitit të kaluar, duke regjistruar vlera më të larta. Në fund të vitit 2012, nënindeksi u ngjit në nivelin 77.1 nga 71.2 që rezultoi një vit më parë. Megjithatë, ky nivel vijon të mbetet poshtë mesatares historike prej 88.5.

Përmirësimi i nënindeksit të mjaftueshmërisë së kapitalit u ndikua kryesisht nga rritja e nivelit të kapitalizimit të sektorit bankar në fund të vitit 2012, në nivelin 16.2% nga 15.5% që ishte një vit më parë. Kjo ecuri solli që vlera e nënindeksit të rritet lehtësisht në nivelin 70.3 nga 69.9 një vit më parë, duke vijuar të mbetet ende nën mesataren historike prej 84.5.

Indeksi i Fortësisë Financiare përllogaritet nga Banka e Shqipërisë, si një mesatare e treguesve përbërës të shëndetit financiar të bankave. Indeksi kombinon gjashtë fusha të treguesve të shëndetit financiar: cilësia e aktiveve, likuiditeti, përfitueshmëria, rreziku ndaj kursit të këmbimit, mjaftueshmëria e kapitalit dhe rreziku ndaj normës së interesit.

HermesNews - ©2013

Dërgo me email | Stampo artikullin