06/05/2013 16:56:29

Çmimet e konsumit u ulen me 0.1 % ne Prill

Ne muajin prill verehet nje zbritje prej 0.1% ne cmimet e konsumit nga muaji mars

TIRANE - Çmimet e konsumit në muajin Prill shënuan një ulje prej 0.1 %, krahasuar me muajin e mëparshëm. Ndryshimi vjetor i indeksit në muajin Prill të këtij viti krahasuar me prillin e vitit të kaluar është 2.3 përqind. Një vit më parë ky ndryshim ishte 1.6 %.

Krahasuar me muajin e mëparshëm, indeksi i grupit "ushqime dhe pije jo alkoolike" shënoi një ulje prej 0.4 %. Ulja më e madhe prej 2.4 % vërehet në nëngrupin "zarzavate përfshirë patatet". Ulje çmimesh vërehen edhe në disa nëngrupe të tjera të grupit të ushqimeve, ku mund të përmendim uljet në nëngrupin "qumësht, djath e vezë" me 0.3 %, "vajra dhe yndyrna" me 0.3 %, "sheqer e ëmbëlsira" me 0.1 %, etj. Në disa nëngrupe të tjera të këtij grupi çmimet shënuan rritje ku mund të përmendim rritjet në nëngrupet "fruta" me 1.7 %, "kafe, çaj e kakao" me 0.4 %, etj.

Indeksi i grupit "Pije alkolike dhe duhan" ka shënuar një ulje 0.1 %, ulje kjo që ka ardhur si rezultat i uljes së çmimit të pijeve alkolike me 0.3 %.Indeksi i grupit "Veshje dhe këpucë" ka shënuar një ulje prej 0.1 %.

Indeksi i grupit "Transporti" ka shënuar një rritje prej 0.4 %. Brenda këtij grupi çmimi i naftës shënoi një rritje prej 0.5 % dhe çmimi i benzinës një rritje prej 0.1 %. Indeksi i grupit "Hotele, kafene dhe restorante" ka shënuar një rritje prej 0.1 %, rritje kjo që ka ardhur si rezultat i rritjes së çmimeve në nëngrupin "shërbime akomodimi dhe "kafe - restorante" me 0.1 %.

HermesNews - © 2013

Dërgo me email | Stampo artikullin