30/04/2013 09:57:14

Rriten eksportet minerale

Vetëm gjatë 3-muajve të parë sivjet, u moren nga ky sektor mbi 1.8 miliardë lekë të ardhura rentë minerare

TIRANE - Rritja e volumit të eksporteve të metaleve, mineraleve dhe naftës po rrit me shpejtësi edhe të ardhurat në shtet nga renta minerare. Sipas të dhënave nga Drejtoria e përgjithshme e doganave, vetëm gjatë 3-muajve të parë sivjet, u moren nga ky sektor mbi 1.8 miliardë lekë të ardhura rentë minerare, një rritje prej 45% më shumë, krahasuar me të njëjtën periudhë të vitit 2012.

Volumet më të mëdha të nxjerrjes së mineraleve u shënuan në muajin mars, ku u mblodhën mbi 720 milionë lekë. Efektin kryesor në rritjen e rentës e japin karburantet, kryesisht kompania e nxjerrjes dhe eksportit të naftës "Bankers Petroleum", si dhe kompania turke "Beralb, e cila eksporton bakër në tregun kinez.

Zhvillimi i sektorit minerar përmes dhënies me konçension të zonave mineralmbajtëse ka rritur të ardhurat në buxhet nga rnta minerare përgjatë 5 viteve të fundit, me tendencë vjetore progresive pozitive. Të ardhurat nga renta minerare, (taksa që vjen nga aktiviteti i minierave) gjatë vitit 2012 shënoi rritjen më të madhe të 5 viteve të fundit. Të dhënat më të fundit të Drejtorisë së Doganave tregojnë se, vjet, të ardhurat nga renta minerare u rritën 65% më shumë se në vitin 2011.

Vjet sektori minerar shënoi rritjen më të madhe të prodhimit dhe kryesoi në total rritjen e eksporteve, duke kryesuar në listën e mallrave "made in Albania". Edhe të dhënat nga ALBEITI, një organizëm e krijuar si nismë për transparencë në industrinë nxjerrëse, financuar nga Banka Botërore, tregojnë se të ardhurat më të mëdha po vijnë nga industria minerare dhe e naftës.

Sektori minerar vjet rriti ndjeshëm prodhimin minerar me 13% më shumë se në 2011-tën, ose 10.3 milionë ton minerale dhe investimet për ruajtjen e mjedisit. Burime zyrtare të ministrisë së Ekonomisë bëjnë të ditur, se në sektorin minerar u rrit me 28% niveli i punësimit vjet, një rritje më e madhja e shënuar pas shumë vitesh në ketë degë të industrisë.

Gjithashtu vjet u rrit ndjeshëm me 154% më shumë se në 2011-tën dhënia e lejeve dhe licencave për sektorin minerar, ku dominuan ato për mineralet e gurit, argjiles, etj. Vitin e kaluar investimet arritën rreth 43 milion usd, me 10% rritje më shumë, krahasuar me vitin 2011 si dhe një tejkalim 3 milion usd, pasi sipas plan-zhvillimeve të bisneseve, investimet e biznesit privat u llogaritën mbi 40 milionë usd.

Pozitive mbetet fakti se vjet u rritën ndjeshëm investimet për ruajtjen e mjedisit, objektiv prioritar për ministrinë, thanë burimet zyrtare të METE-s. Sipas tyre, invstimet mjedisore u rritën gati 7 herë më shumë se në 2011-tën.

Të ardhurat nga renta minerare që vitet e fundit kanë shënuar trend rritës, arritën në 9-mujorin e 2012-tës në shumën 3.663 miliardë lekë, ose 74% më shumë se e njëjta periudhë e 2011. Ky ritëm ka shoqëruar të ardhurat nga renta minerare dhe në dy vitet 2010-2011 të ardhurat nga renta minerare u rritën 98%.

Në fund të vitit 2011 prodhimi i përgjithshëm minerar arriti 8.2 milionë ton produkte minerare, me 32% më shumë se në vitin 2010, ndërsa të ardhurat u dyfishuan dhe nga renta minerare u fituan rreth 10 milionë usd, ose 2.5 herë më shumë se në 2010-tën.

Ndonëse dy vitet e fundit tregu minerar është përballur me periudha të përkohshme të rënies së çmimeve, kryesisht të çmimit të shitjes së kromit, të ardhurat nga renta minerare nuk u ulën dhe eksportuesit e minerareve janë optimistë pasi çmimet po rriten dhe pritet që e tillë të jetë dhe 2013-ta.

Konjuktura botërore e favorshme ka ndikuar vitet e fundit në rritjen e investimeve nga biznesi minerar dhe të prodhimit. Në vitin 2011 përpunimi i mineraleve shënoi trend pozitiv dhe kapacitetet përpunuese të mineralit të bakrit u rritën 170%, të kromit 120% dhe gurëve dekorativë 70%.

Sipas plan-veprimit 3-vjeçar 2011-2014, ministria e Ekonomisë parashikon që produkti minerar të ketë rritje vjetore 5%, ndërsa sipërfaqja totale në shfrytëzim, 860,56 km2.

Edhe treguesit e prodhimit vjetor të minerareve janë rritur ndjeshëm vitet e fundit. Ndërsa në 2011 prodhimi minerar arriti në 8.2 milionë tonë, në 2010-tën u prodhuan 5.9 milion ton, nga 2.27 milionë ton minerare që u prodhuan në 2005. Sektori minerar zë 8% në Prodhimin e Brendshëm Bruto (PPB).

HermesNews - ©2013

Dërgo me email | Stampo artikullin