25/04/2013 10:14:03

Fillon rikonstruksioni i rrugës Krumë-Kukës

Punimet e rinisura një ditë më parë, do të përqëndrohen në segmentin e ri prej 7 kilometrash Qafë Tobli- Myc Has, ku do të hidhen shtresat e çakullit dhe nënshtresat e tjera

HAS - Pas një periudhe ndërprerjeje për mungesë fondi, punimet e rinisura një ditë më parë për rikonstruksionin tërësor të aksit rrugor Krumë- Kukës, 31 kilometra, do të përqëndrohen në segmentin e ri Qafë Tobli-Myc-Has, në një gjatësi prej 7 kilometrash.

Punimet e rinisura një ditë më parë, do të përqëndrohen në segmentin e ri prej 7 kilometrash Qafë Tobli- Myc Has, ku do të hidhen shtresat e çakullit dhe nënshtresat e tjera. Po ashtu, do të hidhet një shtresë stabilizanti dhe do të ndërtohet një urë e re në dalje të qytetit të Krumës.

Ndërsa nënprefekti i Hasit, Ismet Jaku, bën të ditur se "të gjitha proceset e punës kanë përfunduar, ndërsa ka mbetur për t’u kryer edhe procesi i asfaltimit në të gjithë gjatësinë e rrugës së rikonstruktuar, gjë që do të mundësojë përmirësimin e ndjeshëm të lëvizjes së mjeteve në këtë aks rrugor".

Tashmë ka përfunduar zgjerimi i rrugës në të gjithë gjatësinë e saj, duke e kthyer këtë segment nga rrugë një kalimëshe, në dykalimëshe. Në të gjithë gjatësinë e saj ka përfunduar edhe ndërtimi i veprave të artit si ura, tombino, etj.

Rikonstruksioni tërësor i këtij aksi rrugor nisi në muajin korrik të vitit 2009, nga 3 firma ndërtuese vendase, që përfunduan rikonstruksionin e lotit të parë me një gjatësi prej rreth 6 kilometrash. Më pas punimet vazhduan nga firma "Geci", e cila punoi në të gjithë pjesën tjetër të rrugës. Fondi për rikonstruksionin tërësor të këtij aksi rrugor arrin në 15 milionë euro, akorduar nga buxheti i shtetit.

HermesNews - ©2013

Dërgo me email | Stampo artikullin