24/04/2013 09:36:44

FRD, një 'sprovë' për qytetarin

nga Redan Bushati

TIRANE - Një lëvizje e vështirë, sidomos nga pikëpamja elektorale, por që mbart kartën e moralit dhe pacënueshmërisë njollosëse. Fryma e Re Demokratike, një parti e qendrës së djathtë, që drejtohet nga ish-presidenti i vendit Bamir Topi, ku në përbërje të saj ka mjaft emra të rëndësishëm të së djathtës si Gazmend Oketa, Aleksandër Biberaj, Besnik Mustafaj etj., bëri zgjedhjen më të drejtë, atë të pritshme në masë nga qytetarët, por nga ana tjetër të gabuarën, kjo e përllogaritur në termat elektoralë.

Shqipërinë e pas viteve ’90 e ka kapluar klima bipartizane, e cila në një demokraci të brishtë si kjo e jona sjell dëme të pallogaritshme. Mirëpo kjo s’do të thotë që partitë e tjera a priori janë më konstruktive se këta që kanë formuar këtë klimë të tillë të gjymtë. Megjithatë, sa më shumë të shtrihet mundësia e përfaqësimit, aq më mirë do të jetë për qytetarin, gjithmonë në rast se vota nuk cënohet. Në këtë kontekst FRD mbetet një alternativë më vete, e papërlyer, e paprovuar më herët dhe mbi të gjitha, së paku në dukje, me figura që vijnë nga shtresat intelektuale të shoqërisë, nga ish-pronarë dhe ish të përndjekur në kohën e monizmit.

Se cila është ndjeshmëria e qytetarëve ndaj kësaj force të re politike në vendin tonë, kjo mbetet për t’u parë më 23 qershor. Ama një problem i mprehtë për këtë subjekt politik do të jetë masmedia, e cila e epur pas dy koalicioneve, që kryesohen nga dy partitë më të mëdha në vend, do të mundësojë një kohë relativisht të shkurtër për këtë “pol të tretë”. Po ashtu, mospasja e komisionerëve nuk jep aspak garanci për mbrojtjen e votës së FRD, në një klimë të tillë mosbesuese ndaj proceseve zgjedhore në vendin tonë.

Përpos këtyre deficiteve të mëdha, FRD ka një elektorat bazë, i cili më së shumti vjen nga radhët e të zhgënjyerve prej PD dhe në tërësi prej të ashtuquajturës e djathta shqiptare – një lëkundje besimi dhe distancimi që për hir të së vërtetës ka nisur gradualisht, qysh pas zgjedhjeve të vitit 1996. Pikërisht këtë pjesë të terrenit do të synojë FRD. Se sa efektive do të tregohet, kjo varet më së shumti nga puna e bërë dhe që vijon të bëhet në bazat e partisë, kryesisht në ato qarqe ku e djathta përbën edhe shumicën, si Shkodra, Kukësi, Dibra, por pse jo edhe Tirana, Durrësi etj.

Në fund të këtyre radhëve të pakta, si në çastin kur FRD ka publikuar pozicionin e saj elektoral në këto zgjedhje parlamentare, pa dashur të bëj rolin e fallxhorit, gjykoj se kjo parti praktikisht nuk mund të marrë më shumë se 2-3 deputetë. Kjo pasi sistemi është i tillë, klima është bipartizane dhe kultura masive popullore nuk përqaset me një alternativë të re, e cila ndoshta mund të përfaqësojë siç duhet interesin qytetar.

HermesNews - ©2013

Dërgo me email | Stampo artikullin