23/04/2013 19:05:05

Durres, më shumë ujë për zonat bregdetare

60 mijë banorë në të gjithë qarkun furnizohen me ujë në mënyrë të pandërprerë, ndërsa është 3-4-fishuar koha e furnzimit për dhjetëra mijë banorë të tjerë

DURRES - Furnizimi me ujë të pijshëm i zonës bregdetare ka qenë objektivi kryesor i ndërmarrjës së Ujësjellës- Kanalizimeve në Durrës gjatë sezonit 2012-2013. Gjatë kësaj periudhe në bashkitë dhe komunat e qarkut janë shtruar rreth 141 km tubacione me një investim të përgjithshëm prej afro 600 milion leke, tha drejtori i kësaj ndërmarrjeje, Doklead Ademi.

Sipas të njejtit burim, zona turistike në plazhin tradicional dhe ajo e plazheve të reja në komunat me dalje detare në Gjirin e Lalzit do të kenë më shumë ujë jo vetëm në sasi, por edhe në mënyrë ritmike.

Drejtori Ademi shton se gjatë këtij viti janë shtruar linja të reja furnizimi në zonën e Shkëmbit të Kavajës dhe të plazhit të Durrësit, duke përmiresuar ndjeshëm situatën e furnizimit, njëlloj si në plazhet e reja në Hamallaj, Shën Pjetër dhe në Gjirin e Lalzit. Gjatë stinës së verës në vijën bregdetare prej 62 km të qarkut të Durrësit pushojnë mesatarisht 50-60 mijë vetë në ditë.

Rreth 60 mijë banorë në të gjithë qarkun furnizohen me ujë në mënyrë të pandërprerë, ndërsa është 3-4-fishuar koha e furnzimit për dhjetëra mijë banorë të tjerë. Lidhja e 8 mijë kontratave të reja, si dhe vjelja e detyrimeve të faturimeve nga bizneset dhe familjet, kanë përmiresuar situatën financiare të Ujësjellës-Kanalizime në Durrës, tha drejtori Doklead Ademi.

HermesNews - ©2013

Dërgo me email | Stampo artikullin