23/04/2013 19:02:47

Euro mbiçmohet ndaj Lekut

Sipas kursit zyrtar të Bankës së Shqipërisë, një euro u këmbye sot me 140.52 lekë

TIRANE - Monedha europiane euro, që nga fillimi i këtij viti është mbiçmuar me gati 0.7% ndaj lekut. Leku ka vijuar të humbë pikë edhe gjatë ditës së sotme kundrejt euros, duke bërë që monedha e përbashkët të shënojë një tjetër rekord të këtij viti ndaj asaj vendase, ndërkohë që vijon të kuotohet në nivelet më të larta që nga nëntori 2011.

Sipas kursit zyrtar të Bankës së Shqipërisë, një euro u këmbye sot me 140.52 lekë. Kjo është dita e 12-të radhazi që monedha e përbashkët mbiçmohet ndaj lekut. Në tregjet ndërkombëtare euro ra 0.1% në $1.3041.Sipas aktorëve të tregut, arsyeja kryesore e euros së fortë në tregun e brendshëm vijon të mbetet kërkesa e lartë për këtë valutë nga bankat tregtare, që blejnë për llogari të klientëve të tyre.

Megjithatë, përfaqësues të agjencive kryesore të këmbimit në vend pohojnë se tashmë duket se është arritur niveli maksimal dhe ata nuk parashikojnë që euro të rritet përtej kuotës së 140.6, teksa presin që të ketë një ndërhyrje nga ana e Bankës së Shqipërisë me shitje valute, çka do të qetësonte tregun.

Ata gjithsesi parashikojnë që gjatë ditëve në vijim euro të jetë e fortë në bursat ndërkombëtare, por më shumë se me një rritje të mëtejshme të monedhës së përbashkët në tregun vendas, kjo do reflektohet me një rënie të dollarit në tregun vendas. Gjithsesi euro pritet të mbetet e fortë edhe në vend.Edhe dollari shënoi rritje relativisht të fortë gjatë ditës së sotme, duke u kuotuar me gati 107.8 lekë.

HermesNews - ©2013

Dërgo me email | Stampo artikullin