13/04/2013 18:43:43

Konfindustria kërkon falje fiskale për vitin 2012

Mosshoqërimi i uljes së taksave me falje fiskale do të pakësonte ndjeshëm arritjen e qellimit pozitiv të vendimit në fjalë të ekzekutivit te bizneset dhe qytetarët shqiptare

TIRANE - Konfindustria, duke mbështetur parimisht si një veprim të drejtë uljen prej 50% të taksave të regjistrimit të makinave për bizneset dhe qytetarët i kërkon qeverisë, që të përfshije në projekt ligjin e dërguar në Kuvendin e Shqiperise njëkohësisht edhe nje falje e fiskale për pagesat përkatëse deri në vitin 2012.

"Mosshoqërimi i uljes së taksave me falje fiskale do të pakësonte ndjeshëm arritjen e qellimit pozitiv të vendimit në fjalë të ekzekutivit te bizneset dhe qytetarët shqiptare", thuhet ne njoftimin për shtyp të Konfindustrisë.

Konfindustria, vijon njoftimi vlerëson, se ulja e ndjeshme e mirëpritur e taksave për makinat e përdorura, për të dhënë ndikim të prekshëm dhe të drejtpërdrejtë për bizneset dhe qytetarët përfitues dhe njëkohësisht për buxhetin e shtetit është e nevojshme, që të shoqërohet nga falja e plotë fiskale e detyrimeve të mëparshme deri në vitin 2012.

Detyrimet e taksave për makinat e përdorura në vend kanë qenë tepër të larta krahësimisht vendeve të tjera parë nivelin ekonomik të bizneseve dhe qytetarëve shqiptare dhe njëkohësisht vështirësive të krizës globale, që ka përfshirë prej vitesh ekonominë shqiptare.

Gjithashtu është për tu shënuar si arsye bindese shtese, që mbështet vendimin e ekzekutivit për uljen e taksave të makinave të përdorura dhe njëkohësisht kërkesën e Konfindustrisë për faljen fiskale të taksave deri në vitin 2012 vlerësimi, se shqiptarët jane me diferencë të ndjeshme më të ulët për nga zotërimi i makinave për banore jo vetëm me standartin e vendeve të BE( 4-5 herë), por edhe me të gjitha vendet e Rajonit (2-3 here).

"Përgjysmimi i nivelit te taksave shoqeruar me nje falje fiskale te tyre deri ne vitin 2012 do te ishte lehtesim i ndjeshëm për bizneset sidomos ato, që kanë një numer të madh mjetesh në përdorim dhe njëkohësisht edhe për qytetarët shqiptare, duke ndikuar drejtpërdrejtë në rritjen e nivelit të motorizimit të vendit si kusht i domosdoshëm për zhvillimin ekonomik"-përfundin deklarat e Konfindustrise.

HermesNews - ©2013

Dërgo me email | Stampo artikullin