11/04/2013 16:14:11

27,2% papunësia në Greqi

Rajonet më të prekura mbeten rajoni i Epirit në veriperëndim (29,2 për qind), ndjekur nga Atika, qytet i Athinës (28,4 për qind) dhe Maqedoni-Thrakë (verilindje) me 28,2 për qind

ATHINË - Përqindja e papunësisë në Greqi ka vazhduar të regjistrojë rritje në muajin janar duke arritur në 27,2 për qind kundër 26,4 për qind në muajin dhjetor dhe 21,5 për qind një vit më parë duke prekur kryesisht të rinjtë, njoftoi sot Autoriteti grek i Statistikave (Elstat).

Tek moshat më pak se 24 vjeç, rreth gjashtë në dhjetë të rinj, 59,3 për qind janë të privuar nga puna dhe tek të rinjtë e moshës 25-34 vjeç, mbi një e treta, rreth 34,2 për qind, sipas Elstat.

Gratë janë më të prekura se burrat, rreth një e treta mes tyre, 31,4 për qind kundër 23,9 për qind për burrat. Që prej muajit dhjetor 2012, numri i të papunëve është rritur me 95 709 ndërkohë që në një vit, me 281 048.

Rajonet më të prekura mbeten rajoni i Epirit në veriperëndim (29,2 për qind), ndjekur nga Atika, qytet i Athinës (28,4 për qind) dhe Maqedoni-Thrakë (verilindje) me 28,2 për qind. Shpërthimi i papunësisë në Greqi ka ndodhur si pasojë e krizës së borxhit në vitin 2010 dhe politikave shtrënguese të vendosura nga kreditorët e vendit, zona euro dhe FMN.

HermesNews - ©2013

Dërgo me email | Stampo artikullin