11/04/2013 15:19:00

A është fjala në krizë ? Një interpretim i shoqërisë shqiptare

Ditari i Dom Gjergj Metes, ish zëdhënës i Kishës Katolike Shqiptare, kohët e fundit autor i përmbledhjes me publiçistikë Ditar Periferie. 'Një ripërtëritje shpirtërore që nis nga familja natyrore e përhapet në shoqëri do të krijonte klimë më të qetë e do të shtynte politikbërësit drejt veprimeve më të përgjegjeshme'

Ju jeni cilësuar nga mediat, një personazh dhe një ndër njerëzit më aktiv të Kishës Katolike shqiptare, nëpërmjet daljeve tuaja në ekran. Çfarë ju bën kaq të ndryshëm ?

Nuk mendoj se kjo më bën të ndryshëm. Unë jam një prift katolik që jeton misionin e tij të shpalljes së Ungjillit brenda Kishës Katolike dhe nëpërmjet mjeteve të komunikimit. E kam pasur këtë gjë dhe si detyrë zyrtare pasi kam qenë tre vjet zëdhënës i Kishës Katolike në Shqipëri.

Ungjilli, sot shpërndahet dhe online. A besoni se në të ardhmen Papa do të flasë vetëm online ? Kisha katolike do të flasë online ? Si mendoni çfarë vendi ka interneti në gjithë këtë të ardhme ?

Unë mendoj se interneti apo mjetet e komunikimit në përgjithësi janë mjete ndihmesë për të përçuar diçka. Në këtë prizëm këto mjete sigurisht që ndihmojnë në përçimin e Ungjillit tek të gjithë njerëzit. Kisha Katolike në fakt i vlerëson shumë mjetet e komunikimit, aq shumë saqë çdo vit ajo kremton një ditë të veçantë kushtuar mjeteve të komunikimit shoqëror. Sikurse ju e dini Papa është i pranishëm në Twitter, Vatikani dhe shumë Kisha lokale kanë dhe websitet e tyre. Po ashtu shumë priftërinj e njerëz të angazhuar në Kishë përdorin rrjetet sociale. Pra ka një përdorim të gjerë të mjeteve të komunikimit shoqëror. Thënë kjo, këto mjete nuk mund të zëvendësojnë asesi takimin personal, sy me sy e zemër me zemër, pasi Ungjilli para se të jetë një komunikim, është një takim, ai i Zotit me njeriun. E kështu takimin personal nuk mund ta zëvendësojë asnjë mjet tjetër. Dikë që e do e dëgjon në telefon, apo flet në chat, por ama kjo nuk është e mjaftueshme derisa ta takosh e të rrish me të.

Po shkojmë drejt një izolimi shoqëror ?

Fjala ka problemet e veta sigurisht. Mendoj që ajo nuk ka vdekur, por është shituar (shitimi është plagosje). Kjo sepse personat lexojnë gjithnjë e më pak, por edhe sepse shkruajnë gjithnjë e më pak e gjithnjë e më keq. Në këtë pikë komuniikimi virtual ka ndikuar shumë. Ka virtualizuar komunikimin midis njerëzve. Do të thotë se ai nuk është shumë real. Pas një chati mund të fshihet gjithkush, mund të fshihen ndjenjat, emocionet, thellësia e shikimit, trishtimi i syve etj etj. Kurse takimi personal i jep më shumë vlerë fjalës, por dhe heshtjes. Fjala është në krizë, por ajo ka ende shpresë për aq kohë sa njeriu do të ketë nevojë të shprehë të pashprehshmen, misterin e vetvetes dhe të Zotit. Për ne të krishterët pastaj Fjala e Hyjit është bërë e gjallë, është bërë njeri.

Ju mendoni se politika shqiptare është le të themi një drejtuese e mirë e qytetarëve shqiptarë drejt integrimit ?

Për këtë po përgatis një shkrim këto ditë. Mendoj që politika shqiptare ka probleme të thella. Ajo vuan nga konfliktualiteti i skajshëm që në fakt përshkon në mënyrë diagonale krejt shoqërinë tonë. Por në mënyrë të veçantë politika vuan nga makiavelizmi i cili nuk është vetëm thjesht fakti që përdoret çdo mjet për të arritur qëllimin, por veçanërisht mkiavelisti është ai i cili kamuflon sjelljen e tij gjoja i frymëzuar nga ndjenja altruiste që në të vërtetë janë përmbushje e dëshirave egoiste.

Atëherë ka ardhur koha e lëvizjeve qytetare, si në Itali ?

Unë jam klerik dhe në fakt nuk kam për detyrë të jap zgjidhje konkrete. Ato i gjejnë faktorët politik. Italia është tjetër gjë dhe çdo krahasim çalon. Eshtë tjetër realitet, tjetër histori e tjetër formim. Ne jemi tjetër gjë e duhet të gjejmë zgjidhje brenda veçorisë tonë.

Zgjidhja është katolicizmi ?

Unë nuk e thashë. Sigurisht doktrina sociale e Kishës Katolike ka elemente të vlefshëm për një angazhim politik serioz që ka si synim të mirën e përbashkët, por Kisha katolike nuk ka zgjidhje politike. Ato u takojnë partive. Një frymëzim i krishterë është sigurisht një shtysë e fortë për një angazhim serioz. Kjo frymë e krishterë mund të jetë e pranishme në çdo formacion politik e aty mund të japë kontributin e tij. Në Shqipëri pastaj katolikët duhet të angazhohen të sjellin në res publica një frymë dashuri, solidariteti e altruizmi, sidomos aspiratat e të mirës dhe drejtësise.

A mendoni se qytetarëve shqiptarë do t’u vlente nëse do të përqëndroheshin më tepër tek vetveja dhe më pak ndaj lojerëve të politikës ?

Mendoj që qytetarët duhet të vetëdijësohen më shumë akoma. Një ripërtëritje shpirtërore që nis nga familja natyrore e përhapet në shoqëri do të krijonte klimë më të qetë e do të shtynte politikbërësit drejt veprimeve më të përgjegjeshme. Fryma qytetare e pjesëmarrjes politike duhet të jetë e pranishme sidomos në momentin e votimit dhe zgjedhjes së përfaqësuesve.

Ju keni botuar një libër, që quajtur Ditar Periferie . Ka të bëjë me një pikëvështrim tuajin jashtë Tiranës ? Pse "Periferi" ?

Libri është përmbledhje në vite e pibliçistikës sime. Meqë aty kam vënë dhe datat kur janë shkruar e kam quajtur ditar. Periferia ka të bëjë me faktin që pjesa thelbësore e atyre shkrimeve kanë lindur ndërkohë që unë shërbeja si prift në periferi të Tiranës, në Kamëz. Por periferia në fakt është një koncept më shumë se sa urban apo gjeografik. Sikurse ka thënë dhe Papa Francesku, ka dhe periferi ekzistenciale. Edhe me këto periferi sikurse janë varfëria, divorci, vetëvrasja e intelektualit, aborti etj kanë nevojë për praninë shëruese të Ungjillit, dmth të dashurisë së Zotit. Periferia ku jam unë është në të vërtetë qendër pasi prej këtu pulson një jetë e jashtëzakonshme, gjallëri e energji. Spesh periferi janë më shumë qendrat ku sheh frenetizëm, fytyra të rishtuara, stres etj.

Çfarë do të shkruani në librat e tjerë ?

Nuk e di nëse do të shkruaj më. Unë nga profesioni përveçse prift, jam edhe jurist për Kishën Katolike. Do më pëlqente të shkruaja shumë gjëra. Të shohim. Gjërat juridike me tërheqin, por edhe bota e brendshme e njeriut.


* Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi

Intervistoi Doriana Metollari

Dërgo me email | Stampo artikullin