11/04/2013 10:08:30

Kuvendi shtyn miratimin per KQZ

Kërkesa e miratuar dje nga komisioni i Ligjeve u kundërshtua ashpër nga opozita, e cila e konsideroi një veprim antiligjor dhe goditje të rëndë për standardet demokratike

(16:01) Në konferencën e kryetarëve, me propozim të Gramoz Ruçit, kryetar i grupit socialist të opozitës, palët ranë dakord me konsensus që kjo kërkesë të përfshihej në kalendarin e punës së parlamentit dhe të votohej në seancën plenare të ditës së hënë.

Kërkesa e shumicës, e miratuar dje nga komisioni i Ligjeve, u kundërshtua ashpër nga opozita, e cila e konsideroi një veprim antiligjor dhe goditje të rëndë për standardet demokratike. Ndërkohë, para fillimit të seancës së sotme kryetari i LSI-së, Ilir Meta, reagoi ashpër, duke e cilësuar kërkesën e maxhorancës "një sjellje diversantësh".

Ndërsa, grupi i PS-së, i mbledhur paradite, vendosi të votojë kundër zëvëndësimit të anëtarit të LSI në KQZ. Seanca e sotme përfshin diskutimin e një sërë projektligjesh, mes tyre ndryshimet në ligjin "Për pagat dhe shpërblimet e zyrtarëve të institucioneve të pavarura", disa shtesa në kodin civil dhe në kodin e procedurës civile, etj.


TIRANË - Kuvendi pritet të votojë të enjten në seancë plenare kërkesën e PD-së për lirimin nga detyra të anëtarit të KQZ-së, Ilirian Muho, i propozuar nga LSI, si dhe zëvendësimin e tij me një nga dy kandidaturat e paraqitura nga Partia Republikane, Klement Zguri ose Patriot Çoba.

Kërkesa e miratuar dje nga komisioni i Ligjeve u kundërshtua ashpër nga opozita, e cila e konsideroi një veprim antiligjor dhe goditje të rëndë për standardet demokratike. Ndërsa, për maxhorancën largimi i LSI-së nga koalicioni qeverisës sjell nevojën e balancimit të komisioneve zgjedhore.

Kalimi në opozitë i Lëvizjes Socialiste për Integrim prishi balancat në Komisionin Qendror të Zgjedhjeve, duke vendosur raportin 4 me 3 në favor të komisionerëve opozitarë. Po ashtu, edhe komisionet zonale kontrollohen 4 me 3 dhe disa 5 me 2 po nga opozita.

Sipas maxhorancës, prishja e kësaj barazpeshe përmbys sistemin ligjor të menaxhimit të zgjedhjeve dhe paralajmëron manipulimin nga opozita.
Kryeministri Berisha reagoi dje ndaj kësaj situate, duke deklaruar se aleanca PS-LSI kishte qëllim përmbysjen e ekuilibrave në KQZ.

"Parim themelor i raporteve ka qenë dhe mbetet respektimi i marrëveshjeve. Është vendosur që KQZ do të jetë e balancuar, qeveria shumicë me raportin 4-3. Qëllimi i Ramës ishte përmbysja e maxhorancës në KQZ", deklaroi dje kryeministri Berisha, njëkohësisht kryetar i Partisë Demokratike.

HermesNews - ©2013

Dërgo me email | Stampo artikullin