10/04/2013 15:55:27

Arrestohen tetë shqiptarë trafikantë

Ishin trafikantë të qënieve njerëzore dhe drogës

TIRANE - Policia e Shtetit, në bashkëpunim me Policinë e Shtetit italian, ka mundur të realizojë sot arrestimin e 8 shtetasve shqiptarë, pjesë e një organizatë ndërkombëtare të trafikimit të qenieve njerëzore dhe lëndëve narkotike

Policia e Shtetit sqaroi se janë arrestuar në total 34 pjestarë të një organizate kriminale, ku 8-të prej tyre janë arrestuar në disa qytete të Shqipërisë. Të arrestuar sipas policisë janë, Sokol Tafani, Besnik Lleshi, Festim Hoxha, Hygert Allko, Rezart Jaho, Brunild Ramaj, Altin Poda, lindur në Librazhd dhe banues në Tiranë, si dhe Bledar Shabani, lindur në Laç dhe banues në Durrës. Këtij të fundit, pas kontrolleve të kryera nga uniformat blu, iu gjetën në banesën e tij 2.9 kg lëndë të dyshuar si marijuanë.


Vlen të theksohet se veprimet për këto arrestime, në kuadër të aksionit "Sototracia", janë iniciativë e policisë italiane, por që janë shtrirë dhe në disa vende të Bashkimit Europian. Kështu, sipas Policisë së Shtetit, arrestime janë kryer edhe në Itali, Gjermani, Zvicër, Holandë, Francë, Belgjikë, ku dyshohet se organizata ka dhe qendrën kryesore të veprimtarisë së tyre. Po ashtu, sipas Policisë së Shtetit, arrestimi i shtetasve të sipërcituar është realizuar me qëllim ekstradimin, duke qenë se prangosja e tyre ka ardhur pas një urdhër arresti ndërkombëtar, iniciuar nga Italia

HermesNews-©2013

Dërgo me email | Stampo artikullin