22/03/2013 10:23:58

Emigrantët nuk përdoren kollaj, prandaj askush nuk i do atje

Intervistë me Prof. Dr. Shenasi Rama/ Vota e 16 vjeçarëve, fushata dhe loja e njëjtë e partive: 'e gjithë loja bëhet që shqiptarët të mos mund të luajnë ndonjë rol'

Si do ta komentoni përgatitjen që forcat politike po bëjnë për fushatën elektorale ?

Përgatitja që po bëjnë është shumë intensive, mirëpo mungon substanca e duhur. Prijatarët nuk ofrojnë zgjidhje. Nuk kanë asgjë me thanë përveçse që me marrjen e pushtetit, mbështetësit e tyre do të mund të marrin një vend pune. Koalicionet, marrëveshjet, programet, e gjithcka bazohet në këto premtime. Së shpejti do të shohim megamitingjet e turmat histerike, do të dëgjojmë këngëtarët si Ciljeta të ndezin masat, do të përjetojmë edhe përplasjet e sherret personale, por nuk do të ketë substancë e adresim të duhur të problemeve.

Kohët e fundit është folur për të drejtën e votës, që mund t'i jepet dhe 16 vjeçarëve. Ju mendoni se në Shqipëri ka ardhur ky moment ?

Këto janë shashka mediatike, por edhe shprehje të djallëzisë politike. Politikanët po mendojnë që të përdorin cdo gjë për t'i joshur e përdorur dhe të rinjtë. Kulturalisht, po votuan njëherë për ta, do të vazhdojnë të votojnë. Ata që fitojnë do të shpërblehen disi e do të mbesin peng për jetë. Kështu nuk do të ketë zgjidhje jashtë kontrollit të hekurt të parisë. E dyta, nga ana teknike është gati Shqipëria që këtë të drejtë t'a inserojë në këto zgjedhje.
Këta e bëjnë se nuk i kanë mbaruar listat dhe më lehtë e kanë të përfshijnë 16 vjecaret se sa emigrantët.

Dmth 16 vjeçarët janë gati për të qenë të përfshirë politikisht ?

16 vjeçarët, e bile dhe 18 vjeçarët nuk e kanë përgatitjen e duhur. Për të pasur të drejtën e votës duhet të kalosh një provim qytetar që duhet të administrohet nga shteti. Nëse njerëzit nuk e dinë se përse votojnë, atëherë vota e tyre do të jetë një votë e hedhur në shërbim të së keqes. Njerëzit me dënime e precedente penale duhet të jenë të përjashtuar, ashtu si edhe të sëmurët, të paaftët etj. Shkurt, nuk duhet ta ketë gjithkush të drejtën e votës. Dhe 16 vjeçarët natyrisht nuk e kanë dijen e përgatitjen e duhur. Sidomos në një popull ku fliten marrina, ku politikanët janë mashtrues të nivelit më të ulët shoqëror, shteti duhet të krijojë mekanizma për të edukuar qytetarin. Ata që kalojnë provimin, duhet të votojnë. Pse duhet të ketë provim për makinën e jo për votimin?

A mendoni se përfshirja e te 16 vjeçarëve në politikë, duhet të fillojë me informacionin në bazën mësimore, apo edukative ?

Pikërisht, por shkolla është përtokë dhe mësuesit nuk dinë çfarë flasin.

Pse në Shqipëri, askush nuk mendon të ndërrmarë hapa konkret për t'i siguruar të drejtë vote emigrantëve, çfarë do të ishte një zgjidhje shumë e mirë për nivelin e demokracisë në vend ?

Emigrantët nuk përdoren kollaj, prandaj askush nuk i do atje. Do të ishte një zgjidhje e mirë sepse emigrantët kanë përvojë, dije e njohuri se si funksionojnë shoqëritë normale. Paria e Tiarnës nuk i do sepse asaj i duhet një shoqëri kriminale.

A mendoni se në Shqipëri (ashtu si në shumë vende të tjera europiane) lëvizjet qytetare mund të kenë më shumë sukses sesa partite politike ? A ka lëvizje popullore të mirëfillta në Shqipëri ? A ka bazë të mirë për të tilla ?

Ka lëvizje të tilla, por ka një mosbesim të thellë kulturor dhe të trashëguar. Së shpejti do të kalohet edhe kjo gjendje.

Si e parashikoni këtë fushatë politike ? Cilat mendoni se do të jenë të rejat që do sjellë ?

Asgjë të re nuk do të ketë. Ndoshta e lë mjekrën Sali Berisha. Nuk priten të reja të tjera. Këta nuk dalin nga lëkura e tyre.

A mendoni se zhvillimi i mediave online, po krijon rritjen e hapesirës së lirisë në fjalën e lirë në Shqipëri ?

Po. Mendoj se mediumet shoqërore në web po bëhen të dobishme dhe po krijojnë mundësi të mëdha komunikimi e organizimi. Kjo do të jetë dhe më e vyeshme në të ardhmen.

A është rritur përfshirja e qytetarëve në vendimmarrje këto vite ?

Përkundrazi. E gjithë loja bëhet që shqiptarët të mos mund të luajnë ndonjë rol. Qëllimi i parisë së Tiranës është t'i paralizojë qytetarët. Ndryshe ajo nuk mund të bëjë atë që do, d.m.th, të ruajë sundimin oligarkik dhe kontrollin e saj mbi ekonominë, shoqërine dhe vlerat.

Intervistoi Doriana Metollari

Dërgo me email | Stampo artikullin