22/03/2013 06:50:04

Parqet e lodrave shiten për skrap

Ankohen prindërit

KUKES - Në të vetmin park lojërash që kishte mbetur për fëmijët e qytetit të Kukësit, ndodhen tashmë vetëm disa tuba hekuri, pasi lodrat janë shitur për skrap. Prindi Besmir Bala shprehet se "edhe një kënd lojërash që mbeti, po shkatërrohet nga persona të panjohur që po i prishin lodrat për t’i shitur për skrap". Sipas tij, tashmë për fëmijët ka mbetur vetëm rruga për të luajtur.

Në të vetmin park lodrash që kishte mbetur po ashtu është shkatërruar edhe rrethimi. Ndërsa bashkisë as nuk i shkon mendja për t’i zëvendësuar, apo për t’i dhënë një zgjidhje problemit. Parku i lojërave të fëmijëve në qytetin e Kukësit u ndërtua me ndihmën e UNICEF-it pas përfundimit të krizës kosovare. Tashmë ai po shkatërrohet , ndërsa në mjediset e tij ka nisur edhe zgjatimi i pijetoreve.

Tashmë si pasojë e shtesave të pallateve, e ndërtimeve të një vargu banesash me e pa leje, janë zënë thuajse të gjitha mjediset e lira mes pallateve. Aq sa nuk ka mbetur më një mjedis i lirë as për fëmijët dhe as për moshën e tretë. Kjo situatë sa vjen e rëndohet, ndërsa askush nuk mendon për t’i dhënë një zgjidhje.

HermesNews - ©2013

Dërgo me email | Stampo artikullin