06/03/2013 16:24:26

Shtyhet raporti i komisionerit mbi diskriminimin

Opozita ka kërkuar që në mbledhjen e radhës të jenë të ftuar për diskutim dhe grupe të interesit që bashkëpunojnë me komisionerin

TIRANË - Komisioni kuvendor i Punës, Çështjeve Sociale e Shëndetësisë shtyu për javën e ardhshme diskutimet për raportin e komisionerit për mbrojtjen nga diskriminimi. Opozita ka kërkuar që në mbledhjen e radhës të jenë të ftuar për diskutim dhe grupe të interesit që bashkëpunojnë me komisionerin.

Deputetët e opozitës në komision e kanë cilësuar si jo të plotë punën e bërë nga Komisioneri për Mbrojtjen nga Diskriminimi gjatë vitit të kaluar. Një javë pas raportit në komision të komisioneres Irma Baraku, deputetja socialiste Eglantina Gjermeni tha për mediat se raporti nuk kishte pasqyruar shumë tema të mprehta sociale të 2012, siç ishin protestat e invalidëve kundër heqjes së kompensimit të energjisë, me ndryshimet ligjore që iu bë ligjit për statusin e invalidit, apo problemet me vonesat e dhënies së pagesave të aftësisë së kufizuar në dy muajt e fundit të 2012.

Por komisionerja për mbrojtjen nga diskriminimi Irma Baraku thotë se puna e mirë e stafit të saj ka reflektuar dhe në rritjen e numrit të ankesave gati 6-fish më shumë se në vitet e shkuara. Sipas zonjës Baraku, në lidhje me pretendimet e ngritura nga opozita nuk ka pasur ankesa.

HermesNews - ©2013

Dërgo me email | Stampo artikullin