06/03/2013 09:28:30

Stuhitë e dëborës, anulohen fluturimet në SHBA

Disa shtete, nga Minesota në veri të vendit deri në Virginia në lindje, gjendeshin në rrugën e kësaj stuhie, që shkaktoi reshje të dendura dëbore,

SHBA - Një stuhi dëbore, që ka goditur disa shtete në veri të SHBA-së dhe që po lëviz drejt kryeqytetit, shkaktoi dje anulimin e rreth 2 600 fluturimeve dhe mbylljen e qindra shkollave duke i bërë të pakalueshme rrugët në shumë rajone.

Disa shtete, nga Minesota në veri të vendit deri në Virginia në lindje, gjendeshin në rrugën e kësaj stuhie, që shkaktoi reshje të dendura dëbore, që arrinin deri në 60 centimetra në Montana, në veriperëndim të SHBA-së.

"Të paktën katër persona kanë humbur jetën nga aksidentet në rrugë dhe autostrada të mbuluara nga dëbora", theksuan burime mediatike vendase.
Stuhia arriti mbrëmjen e djeshme në qytetin e Çikagos, në Illinois, në veri të vendit, ku pritet deri në 30 centimetra dëborë. Më tepër se 900 fluturime u anuluan në aeroportin O'Hare të qytetit dhe 260 të tjera në aeroportin e Çikagos.

Më tepër se 100 fluturime u anuluan gjithashtu në Mineapolis, Minesota në veri të vendit, sipas burimeve zyrtare amerikane. Përveç kësaj, 1 162 fluturime të planifikuara për sot janë anuluar në pritje të stuhisë, kryesisht në rajonin e kryeqytetit.

HermesNews - ©2013

Dërgo me email | Stampo artikullin