28/02/2013 09:57:43

Nderim për dy dëshmorët e 97-tës Besnik Hidri dhe Leke Qokaj

Homazhe në Qendrën e kulturës. Ish punonjësit e SHISH do të rivarrosen në Varrezat e dëshmorëve të atdheut

(18:13) Kryeministri Sali Berisha bëri të enjten homazhe në Qendrën Kulturore të Ushtrisë në nderim të Dëshmorëve të Atdheut, Besnik Hidri dhe Lekë Qokaj, ish-punonjës të Shërbimit Informativ Shtetëror (SHISH), të rënë në krye të detyrës në vitin 1997 dhe që do të rivarrosen në Varrezat e Dëshmorëve të Atdheut. Në një prononcim për mediat, kryeministri Berisha theksoi se "shqiptarët sot po përulen me nderimin më të madh para qëndresës, trimërisë, heroizmit të dy shërbëtorëve të shquar të lirisë, oficerëve të Shërbimit Informativ Shqiptar, Besnik Hidrit dhe Lekë Qokajt, që ranë në krye të detyrës për të fituar nderin dhe pavdeksinë". "Shqiptarët sot i përcjellin ata në varrezën e të rënëve të kombit. Me këtë akt bëhet një mbyllje morale e njërit prej skenarëve më të turpshëm në historinë e këtij kombi, rebelimit komunist të vitit 1997, i cili i kushtoi vendit jetë të shumtë njerëzish, rebelim, i cili solli në pushtet me dhunë ata që nuk e meritonin", tha Berisha.


TIRANË - Në mjediset e Qendrës së kulturës, medias dhe botimeve të mbrojtjes zhvillohen homazhe në nderim të Dëshmorëve të Atdheut, Besnik Hidri dhe Leka Qokaj, ish-punonjës të Shërbimit Informativ Shtetëror (SHISH), rënë në krye të detyrës në vitin 1997. Ata do të rivarrosen në Varrezat e Dëshmorëve të Atdheut. Dëshmorët Besnik Hidri e Leka Qokaj kanë qënë punonjës të SHISH dhe më 28 shkurt 1997 ranë në krye të detyrës për mbrojtjen e institucioneve shtetërore në Vlorë. Në vitin 2004 Presidenti i Republikës, Alfred Moisiu, i akordoi Besnik Hidrit dhe Leka Qokajt "Medaljen e Shqiponjës së Artë" (pas vdekjes), me motivacionin: "Në shenjë nderimi dhe vlerësimi të lartë për veprimtarinë dhe kontributin e vyer në shërbim të shtetit, deri në aktin sublim, dhënien e jetës në krye të detyrës". Besnik Hidri dhe Leka Qokaj janë shpallur dëshmorë të Atdheut në vitin 2006 nga Komisioni i Posaçëm Qeveritar.

HermesNews - ©2013

Dërgo me email | Stampo artikullin