24/02/2013 12:33:45

Italianët drejt kutive të votimit

Pier Luigi Bersani, votoi në Piacenza

(12: 00) Sekretari i përgjithshëm i Partisë Demokrate, njëkohësisht kandidati kryesor për fitimin e zgjedhjeve parlamentare në Itali, Pier Luigi Bersani, votoi në Piacenza, në shkollën fillore Renzo Pezzani. Bersani votoi në qendrën e votimit numër 37, i shoqëruar nga bashkëshortja Daniela Ferrari dhe vajzat Elisa e Margherita.


(11:00) Kryeministri italian, Mario Monti sapo ka votuar në Milano, në një shkollë fillore në Novaro, në sheshin ''Siçilia''. Monti ishte i shoqëruar nga bashkëshortja Elsa dhe përqark dhomës së fshehtë ku do të votonte ishin vendosur shirita për të mbajtur larg gazetarët dhe fotografët. Pas votimit, kryeministri italian nuk dha asnjë deklaratë për median.


ROMË - U hapën sot qendrat e votimit për zgjedhjet e përgjithshme parlamentare, për rinovimin e Senatit dhe të Dhomës së Deputetëve. Në rajonet e Lombardisë, Lacios dhe Molizes do të votohet edhe për rinovimin e këshillave rajonale dhe për presidentët e këtyre rajoneve.

Zgjedhësit në territorin kombëtar të vendit janë: për Dhomën e Deputetëve 47 011 309, nga të cilët 22 569 269 meshkuj dhe 24 442 040 femra: për Senatin 43 071 494, nga të cilët 20 547 324 meshkuj dhe 22 524 170 femra

Do të zgjidhen 618 deputetë dhe 309 senatorë. Qendrat e votimit janë 61 597. Italianët që do të votojnë jashtë vendit për Dhomon e Deputetëve janë 3 438 670. Italianët që do të votojnë jashtë vendit për Senatin janë 3 103 887. Këta të fundit do të zgjedhin 12 deputetë dhe gjashtë senatorë.

Zgjedhjet në tre rajonet kanë 12 838 939 votues. Qendrat e votimit mbyllen sot në orën lokale 22:00 për t'u hapur nesër nga ora 07:00 deri në orën 15:00. Menjëherë pas mbylljes së qendrave të votimit fillon numërimi i votave.

HermesNews - ©2013

Dërgo me email | Stampo artikullin