23/02/2013 16:54:31

PD, Konventa e PS apo e Ramës ?

PD garantoi socialistët e thjeshtë shqiptarë se interesat e tyre qytetare nuk do të mbeten jetime

TIRANË - Partia Demokratike shprehu sot keqardhjen, që për herë të parë pas 20 vjetësh, në betejën elektorale të 23 Qershorit nuk do të ketë përballë opozitën e vërtetë socialiste.

"Për dy ditë me rradhë, në një parodi të vërtetë në Pallatin e Kongreseve u legjitimua asgjësimi i plotë i PS-së dhe u themelua 'Partia e Re Rama', një amalgamë e pinjollëve të bllokut Hoxhist me 99-shat dhe Rama me mjaftin e tij.

Prej dy ditësh Partia Socialiste e Shqipërisë, kundërshtarja tradicionale 20 vjeçare e Partisë Demokratike në të gjitha betejat elektorale kaloi në ilegalitet por tashmë jo në male apo bodrume, por ajo u ndrydh në botën virtuale apo atë të facebook-ut për të mos dalë dot më prej saj", tha sot përmes një deklarate për shtyp zëdhënësja e PD-së Laura Vorpsi.

PD garantoi socialistët e thjeshtë shqiptarë se interesat e tyre qytetare nuk do të mbeten jetime. "Në zgjedhjet e 23 qershorit, së bashku do ti rezervojmë “partisë Rama” apo partisë së Re të një grupi të vogël të pinjollëve të bllokut, 99-shave dhe Mjaftucëve të z.Rama, fatin që i rezervuam G99-tës në zgjedhjet e shkuara parlamentare", tha Vorpsi.

Duke e lënë të majtën shqiptare të merret me vetveten dhe duke mos hyrë në punët e brendshme të partive të tjera, Partia Demokratike uroi z.Rama për Partinë e re dhe shprehu vullnetin e plotë se është e gatshme dhe e hapur të bashkëpunojë me “Partinë e re Rama”, për të krijuar infrastukturën dhe klimën më të mirë parazgjedhore në mënyrë që shqiptarët me 23 qershor 2013 të kenë zgjedhjet më të mira në historinë e Shqipërisë.

"Ne jemi të bindur se ky bashkëpunim dhe kjo klimë mirëkuptimi me 'Partine e re Rama' mund të bëhet realitet në të mirë të shqiptarëve, pasi për hir të së vërtetës, kjo nuk është hera e parë që ne kemi bashkëpunuar me këtë parti.

Kujtojmë këtu bashkëpunimin e shkëlqyer dhe efikas që PD pati me “Partinë e re Rama”, me Mjaft -in dhe G99-tën ne vitin 2005 për të përmbysur qeverinë Nano. Ne ia dolëm atëherë, pse mos t'ia dalim dhe tani dhe t’u japim shqiptarëve zgjedhjet më të mira, më të ndershme dhe më të lira në historinë e Shqipërisë", përfundon deklarata për shtyp e PD-së.

Komunikatë për Shtyp

Dërgo me email | Stampo artikullin