18/02/2013 19:32:15

Afatet e plotesimit te formulareve A1 dhe A1Z, deri me 10 Mars

Formulari A1 është i vlefshëm për t’u regjistruar në provimet me zgjedhje për ata maturantë që do të përfundojnë provimet e detyrueshme këtë vit, ndërsa formulari A1Z u jep mundësinë të regjistrohen në provimet me zgjedhje kandidatëve

TIRANË - Maturantët dhe kandidatët për studentë, duhet të plotësojnë formularin A1 dhe A1Z, deri më datën 10 mars. Formulari A1 është i vlefshëm për t’u regjistruar në provimet me zgjedhje për ata maturantë që do të përfundojnë provimet e detyrueshme këtë vit, ndërsa formulari A1Z u jep mundësinë të regjistrohen në provimet me zgjedhje kandidatëve që i kanë shlyer provimet e detyrueshme vjet ose më parë.

Sipas udhëzimit të ministrisë së Arsimit dhe Shkencës, kandidatët do t’i plotësojnë këta formularë ‘online’, në shkollat, ku janë të regjistruar dhe në mbikëqyrjen e mësuesve, masë kjo që do t’u vijë në ndihmë atyre për të kryer saktë aplikimin.

Plotësimi i formularëve apo dokumenteve nga kandidatët që duan të studiojnë jashtë vendit, do të bëhet në një datë tjetër, e cila do të bëhet e ditur në ditët në vijim.

Në rregullore janë përcaktuar të gjitha kushtet që duhet të plotësojnë nxënësit për 4 provimet. Në të gjithashtu janë përfshirë penalizimet dhe kohëzgjatja e testimeve. Për secilin nga provimet me detyrim dhe me zgjedhje nxënësit do të kenë në dispozicion 1 orë e 30 minuta.

Pyetjet e testit duhet t’u përmbahen programeve orientuese, të cilat tashmë janë dorëzuar në drejtoritë arsimore.

Sipas procesit, pas plotësimit të formularëve A1 dhe A1Z, maturantët do të aplikojnë për formularin A2, ku listohen degët e preferuara universitare.

HermesNews - ©2013

Dërgo me email | Stampo artikullin