13/02/2013 18:01:24

Shpallet vendimi për çështjen Gërdeci

Gjykata e Apelit ka ulur me 1/3 masën e dënimit për të pandehurit Mihal Deliorgji dhe Dritan Minxholli

TIRANE - Gjykata e Apelit në Tiranë shpalli të mërkurën vendimin lidhur me çështjen "Gërdeci". Sikurse u bë e ditur në seancë, kjo Gjykatë la në fuqi vendimin e Gjykatës së Shkallës së Parë, por me disa ndryshime.

Kështu, në vendimin e saj, Gjykata e Apelit ka ulur me 1/3 masën e dënimit për të pandehurit Mihal Deliorgji dhe Dritan Minxholli, përkatësisht ish- administratori i shoqërisë "Albademil" sh.p.k dhe ish-drejtori i Fabrikës se demontimit të municioneve në Gërdec, pasi pranoi kërkesën e tyre për gjykim të shkurtuar.

Të pandehurit Deliorgji dhe Minxholli ishin dënuar nga Gjykata e Shkallës së Parë me 10 dhe 18 vjet burg. Ndërsa ish-kreu i MEICO-s,Ylli Pinari u dënua me 15 vjet burg, nga 18 vjet që ishte dënuar nga Gjykata e Shkallës së Parë.

Ish- shefi i shtabit të Përgjithshëm i Ushtrisë Luan Hoxha u dënua me 5 vjet burg, nga 6 vjet që ishte dënuar në Gjykatën e Shkallës së Parë. Ndërkohë, të pandehurit e tjerë, u dënuan me masa më të lehta, me përjashtim të ish-gjeneralit Shpëtim Spahiu, i cili u shpall i pafajshëm.

Të pandehurit e procesit, në pjesën më të madhe ish-zyrtarë të ministrisë së Mbrojtjes dhe Ushtrisë, akuzohen si përgjegjës për ngjarjen e ndodhur në 15 mars të vitit 2008 në fshatin Gërdec, Tiranë, kur si pasojë e një shpërthimi në fabrikën e demontimit të municioneve luftarake humbën jetën 26 persona dhe u plagosën shumë të tjerë. Si të pandehur në këtë proces ishin 29 persona.

HermesNews - ©2013

Dërgo me email | Stampo artikullin