11/02/2013 09:21:44

Vullneti i mirë i Presidentit Amerikan: reduktim arsenali bërthamor

Në pritje të fjalimit që Presidenti Amerikan Barack Obama do të mbajë të Martën në Kongres

WASHINGTON - Presidenti i SHBA-së, Barack Obama do të kërkojë një reduktim të konsiderueshëm të arsenalit bërthamor amerikan në mbarë botën, gjatë fjalimit për gjendjen e Unionit që do të mbajë të martën para Kongresit, njoftoi dje në mbrëmje e përditshmja New York Times. Duke cituar zyrtarë të administratës, e përditshmja theksoi se presidenti Obama është shprehur muajt e fundit për mundësinë e reduktimit të një të tretës të arsenalit amerikan.

''Në fjalimin e tij, Obama nuk do të japë shifra, por zyrtarët e Shtëpisë së Bardhë mendojnë reduktimin në rreth 1 000 të numrit të armëve bërthamore'', shtoi NYT. SHBA-ja posedon aktualisht rreth 1 700 armë bërthamore. Sipas traktatit të nënshkruar me Rusinë, këto dy vende janë angazhuar t'i çojnë rezervat e tyre në 1 550 para vitit 2018.

''Por, Barack Obama beson se mund të bëjë reduktime më radikale të arsenalit bërthamor dhe të kursejë më shumë të holla, pa cënuar sigurinë e Amerikës gjatë mandatit të dytë. Edhe shefat ushtarakë e kanë miratuar këtë ide'', shkruan New York Times.

HermesNews - ©2013

Dërgo me email | Stampo artikullin