08/02/2013 19:32:50

Gjykata, Ambasada dhe Zgjedhjet

nga Doriana Metollari

HermesNews - Kjo është hera e parë që një gjykatë shqiptare kritikon deklaratën e Ambasadës Amerikane që i referohet një proçesi gjyqsor, ndaj të cilit ajo vetë kishte ofruar ndihmë teknike në hetime.

Deklarata e Ambasadës, e cila i referohej ndihmës së shumëanshme, me ekspertizë nga Laboratori kriminalistik i byrosë federale të investigimit, bëri një thirrje për hetim dhe proçes gjyqësor tërësor, gjithëpërfshirës dhe objektiv.

"...verdikti i sotëm ka minuar besimin në aftësinë dhe gatishmërinë e sistemit gjyqësor shqiptar për të dhënë drejtësi në mënyrë të paanshme dhe transparente", thuhej në deklaratë, çfarë më bëri të mendoj se ky veprim ishte jashtë profilit diplomatik të një Ambasade, ndaj teknikisht, deklarata e sotme e bërë nga Gjykata e Tiranës, por mbrojtjen e pavarësisë së punës së saj, ishte e drejtë. Fakti që Ambasada apo DASH solli ekpertët e FBIsë nuk do të thotë që një gjykatë nuk mund t'i hedhë poshtë raportet e tyre.

Por ishin vërtet për t'u hedhur poshtë raportet ?

Jam kurioze të di arsyet pse, të Trupit gjykues, sepse shqiptarët ende duan të dinë pse u shpallën të pafajshëm dy persona që qëlluan mbi turmën dhe vranë njerëz ? Cila është llogjika që mbron të shtënat kundër turmës, kur ato mund të ishin fare mirë në ajër, gjatë një protestë ? Në cilin shtet dhe ligj demokratik, thuhet së duhen vrarë të terë ata që i afrohen insititucionit të K/ministrisë ? Qytetarëve, atyre që e besojnë dhe ata që nuk i besojnë më kësaj Qeveri, u detyroheni një proçes transparent dhe të ndershëm, jo vendime ekstreme që çojnë në revolta, lehtësisht të manipulueshme, popullore.

Para vendimit të Gjykatës, K/ministri ka bërë shumë deklarata në lidhje me këtë proçes, ateherë kur ai ishte ende në duart e drejtësisë, ndaj nuk mund të mos e komentonte dhe dje; të paktën jo me"nuk komentoj vendimet e gjykatave". Mos vallë mesazhi i saj ishte nuk komentoj një vendim që unë e quaj të drejtë ?

Nga një tjetër profil, Edi Rama, po përpiqet të ndjekë ritmin e tij elektoral. Nuk mund të mos e komentonte vendimin e gjykatës, por është shumë afër zgjedhjeve dhe rrezikon seriozisht të ndezë gjakra, çfarë në ketë moment, do të ishin fatale për vendin. Komenti i tij përfundoi në një deklaratë që e sposton vëmendjen tek "drejtësia e paszgjedhjeve", çfarë la të kuptojë se nuk ka ndërmend t'i bashkohet stilit amerikan. Rama preferon të përgatisë njerëzit për votimet dhe është shumë i përqendruar aty, meqë kundërshtari është i mbërthyer nga shijet e këqija të imazhit vet, mazhoranca është në kaos, Rama jo.

FRD, ka dalë në skënë me idetë për votat jo për koalicionet, çfarë do të thotë se pas zgjedhjeve do të vendosë. LSI, me politikën e saj "shumë diplomatike" shpreh solidaritet ndaj dialogut dhe jo partive, në kërkim të preferencave tek qytetarët, por ashtu si demokratët dhe asaj do t'i duhet të bëjë hesapet me skandalet gjatë qeverisjes. E megjithatë as FRD dhe as LSI nuk janë të pavendosur, i kanë idetë shumë të qarta biles.

Të vetmit që humbin në çdo rast janë qytetarët, nëse askush nuk do të mendojë të ndryshojë mekanizmin e qeverisjes.

HermesNews - ©2013

Dërgo me email | Stampo artikullin