07/02/2013 09:42:33

Berisha, nuk komentoj vendimet e gjykatave

Berisha nuk pranoi të komentonte vendimin e Gjykatës së Tiranës për lirimin e tre të akuzuarve për '21 Janarin'

(20:37) Ministri i Drejtësisë, Eduart Halimi deklaroi sot se “Edi Rama dhe Partia Socialiste sulmuan sot në mënyrë të paprecedente drejtësinë shqiptare, pasi ajo shpalli të pafajshëm tre gardistët që mbrojtjen institucionet kushtetuese më 21 janar, duke zbatuar plotesisht ligjet e Republikes se Shqiperise”.

Në një deklaratë për mediat, Halimi tha se “me këtë akt të pazakontë në historinë e demokracisë shqiptare dhe botërore, Edi Rama, sulmoi shtetin e së drejtës thjesht dhe vetëm për të mbrojtur vetëveten, si arkitekti kryesor i dhunës së 21 janarit”.

"Edi Rama është i vetmi politikan që komenton sistematikisht vendimet e gjykatave, duke dashur t’i shndërrojë ato në vendime politike. Ne fakt, që nga ajo ditë tragjike për familjet e viktimave dhe nga ai sulm i dhunshëm i institucioneve shtetërore, Edi Rama nuk ka bërë gjë tjetër vecse e ka politizuar këtë process, duke ushtruar presion sistematik për dy vjet me radhe, per cdo dite dhe çdo minute, mbi drejtesine shqiptare, per te ardhur ne kete dite kur i futi thonjte ne fyt nje pushteti tjeter qe nuk varet nga askend”, u shpreh ai.

Më tej ministri tha se "kjo nuk është hera e parë që Edi Rama sulmon drejtësinë shqiptare kur nuk i pëlqenjë vendimet e saj, dhe as e para që hesht kur vendimet e saj i vijnë përshtat.Kështu heshti zoti Rama kur djali i Gramoz Rucit plagosi në mes të Tiranës një qytetar të pafajshëm dhe drejtësia e la atë të lirë. Kështu heshti Edi Rama edhe kur djali i Luiza Xhuvanit vrau gjakftohtë me një plumb në kokë një djalë të ri e të pafajshëm. Sot përpara drejtësisë duhet të ishte vetë Edi Rama, arkitekti i vetëm i dhunës ndaj institucioneve të pavarura dhe shtetit të së drejtës".

Sipas tij, ndaj sulmi i tij tregon vetëm frikën se verdiktet e drejtësisë shqiptare do t’i afrohen edhe karriges së tij. "Shqiptarët dhe çdo njeri normal në këtë vend nuk e kuptojnë se cila është lidhja mes vendimit të një gjykate të pavarur dhe vendimit të Edi Ramës dhe Partisë Socialiste për të bojkotuar parlamentin. Por shqiptarët më në fund e kanë kuptuar modelin Rama: model që ben presion politik mbi cdo institucion te pavarur, sistematikisht derisa ne fund kerkon ti asfiksoje ato totalisht", përfundoi deklaratën për mediat ministri Halimi./a.g/


(20:33) Kryeministri Sali Berisha deklaroi të enjten se nuk do të komentonte asnjë lloj vendimi të gjykatave. Gjatë një konference për shtyp nga selia e Kryeministrisë, Berisha nuk pranoi të komentonte vendimin e Gjykatës së Tiranës për lirimin e tre të akuzuarve për "21 janarin". Më herët Gjykata e Tiranës shpalli të pafajshëm tre të akuzuarit për vrasjen e 4 qytetarëve në demostratën e opozitës para Kryeministrisë me 21 janar të vitit 2011.


(20:12) Deputetët e Partisë Socialiste (PS) të opozitës braktisën të enjten punimet e seancës plenare të Kuvendit, pas debateve të forta, menjëherë pas vendimit të dhënë nga gjykata për ngjarjet e 21 janarit, ku të akuzuarit për vrasje u shpallën "të pafajshëm".

Fillimisht, debati nisi mes deputetit të PS-së, Saimir Tahiri dhe ministrit të Drejtësisë, Eduard Halimi. Më pas, deputeti socialist, duke e marrë fjalën në foltoren e parlamentit, tha se me vendimin e sotëm të Gjykatës "drejtësia mori fund". Pas, kësaj deklarate deputetët e majtë u larguan nga salla.

"Ju keni salduar thellë tek njerëzit mendimin që ky pushtet mund të vrasë, mund të rrënojë jetën dhe të ardhmen, dhe drejtësia i shpëton dhe nuk mban më njeri përgjegjësi. Sot i keni treguar shqiptarëve që është e rrezikshme që të kesh të drejtë, kur pushteti e ka gabim. Ne, me këtë parlament nuk kemi më punë, ne do të ikim", deklaroi Tahiri.

Në reagimin e saj të menjëhershëm kryetarja e Kuvendit, Jozefina Topalli, i krahasoi deputetët socialistë me anëtarët e byrosë politike të sistemit komunist.

"Ju jeni të njëjtët. Janë mësuar që për pesëdhjet vite të bënin prokurorin e gjykatësin dhe thoshin 't'i varin në litar'. Por, harrojeni, ka ndryshuar koha. Ti mund të jesh sekretari i parë i Tiranës, por si Xhelil Gjoni nuk mund të jesh o qyqar", iu drejtua Topalli deputetit të PS-së, Tahiri.

Duke marrë shkas nga vendimi për 21 janarin ajo theksoi se "kur drejtësia flet të gjithë duhet të heshtin". Sipas saj, opozitarët janë "të paburrë" pasi i nxorrën në bulevard për t'i vrarë demonstruesit dhe ikën.


(20:09) Kreu i Partisë Socialisite Edi Rama reagoi pas vendimit të gjykatës, e cila shpalli sot të pafajshëm, për mungesë provash, të akuzuarit e ngjarjes së 21 Janarit. Gjatë një konference për shtyp nga selia rozë, Rama e cilësoi vendimin e sotëm si “vrasje të dyfishtë të viktimave të 21 Janarit”. Duke shprehur indinjatë për këtë vendim, lideri socialist tha se “ky është një pushkatim i drejtësisë dhe rrënim moral e politik i pushtetit”. “Sot nuk pati gjykim, -shtoi ai, por përqafim mes vrasësve të drejtësisë dhe vrasësve të katër protestuesve”. Rama premtoi se ky nuk është një proces i mbyllur dhe se përgjegjësit do marrin dënimin e merituar pas pak muajsh, kur Partia Socialiste të vijë në pushtet.


(19:15) Ambasada e SHBA-së në Tiranë, ka reaguar sot lidhur me vendimin e Gjykatës së Tiranës ku shpalli të pafajshëm ish komandantin e gardës Ndrea Prendi dhe gardistin Agim Llupo, të cilët akuzoheshin për vrasjen e 4 demonstruesve, gjatë protestës së 21 Janarit 2011.

Në një deklaratë për mediat, Ambasada e SHBA-së deklaron se "jemi të tronditur nga vendimi i Gjykatës së Rrethit Tiranë për të shpallur të pafajshëm dy të pandehur që u gjykuan për akuza në lidhje me vdekjen e tre protestuesve më 21 janar 2011. Menjëherë pas 21 janarit 2011, Shtetet e Bashkuara, si një mike dhe mbështetëse e popullit shqiptar, iu përgjigjën një kërkese urgjente të Qeverisë së Shqipërisë dhe Zyrës së Prokurorit të Përgjithshëm për asistencë në hetimin e vrasjeve".

Në deklaratën e shpërndarë nga zyra e shtypit e Ambasadës thuhet se "Shtetet e Bashkuara dhanë ndihmë të shumëanshme, përfshirë ekspertizë nga Laboratori Kriminalistik i Byrosë Federale të Investigimit, një nga më të mirët në botë. Përgjatë gjykimit të çështjes, Shtetet e Bashkuara kanë bërë vazhdimisht dhe në mënyrë konsekuente thirrje për një hetim dhe proces gjyqësor tërësor, gjithëpërfshirës dhe objektiv".

"Fatkeqësisht, verdikti i sotëm ka minuar besimin në aftësinë dhe gatishmërinë e sistemit gjyqësor shqiptar për të dhënë drejtësi në mënyrë të paanshme dhe transparente", thuhet në deklartën për shtyp të Ambasadës së SHBA-së në Tiranë.


(19:00) Kreu i PSV91 Petro Koçi e quajti "...akt përbën një atentat ndaj shpresës se Shqipëria mund të bëhet. Vendimi i gjykatës për të rivrarë dëshmorët e 21 Janarit na rikujton dhe një herë se shteti ka rënë dhe rron vetëm pushteti kriminal i qeverisë Berisha."

"PSV91 i bën thirrje qytetarisë mbarëshqiptare të reagojë kudo dhe në mënyrë të bashkuar për të rrëzuar ndërgjegjen antishtetërore të Kryeministrit antishtet Sali Berisha dhe për të punuar sëbashku me opozitën progresiste për rotacion të shpejtë qeverisës dhe instalim të ndërgjegjes shtetërore në qeverisjen e re të vendit. Vendi ka nevojë për demokraci dhe drejtësi institucionale. PSV i shpreh mirënjohje Ambasdës së SHBA në Tiranë për vlerësimin pa ekuivok të natyrës antishtetërore të vendimit të sotëm të gjykatës," perfundon deklarata per shtyp.


(18:00) Ish-kreu i Gardës së Republikës, Ndrea Prendi dhe gardisti Agim Llupo u shpallën të pafajshëm nga Gjykata e Tiranës e cila dha sot vendimin përfundimtar për ngjarjen e 21 Janarit, ku mbetën të vrarë katër protestues. Trupi gjukues rrëzoi akuzën e prokurorisë për "vrasje me dashje në rrethana cilësuese", akuzë për të cilin Prokuroria kërkoi 23 vjet për Prendin dhe 25 për Llupon. Pas vendimi gjykata urdhëroi lirimin e Prendin nga "arresti shtëpiak" dhe lirimin e Llupos nga burgu.


TIRANË - Gjykata e Tiranës, seksioni i krimeve të rënda pritet sot të japë vendimin për çështjen e 21 Janarit. Të pandehurit e kësaj çështje janë ish komandanti i gardës Ndrea Prendi dhe gardistin Agim Llupo, të akuzuar për vrasjen e 4 demonstruesve, gjatë protestës së 21 Janarit 2011.

Çfarë ka ndodhur/ Avokati mbrojtës i Agim Llupos, Besnik Cerepja, një ditë më parë, akuzoi Prokurorinë duke pretenduar se në asnjë moment të hetimeve, përfaqësuesit e akuzës nuk kanë hetuar dhunën ndaj efektivëve të Gardës, të cilët sipas tij, kanë qenë të detyruar të qëllojnë në ajër dhe në asnjë rast nuk kanë qëlluar drejtpërdrejtë në turmë.

Ashtu si edhe kolegu i tij edhe avokati i ish-komandatit të Gardës Ndrea Prendi, Genc Gjokutaj kundërshtoi akuzën e Prokurorisë për vrasje me asryetimin se ka mungesë provash.

Po sipas Gjokutajt, prokurorët e çështjes nuk kanë evidentuar faktin se forcat e Gardës u ndodhën të vetme dhe në numër shumë të vogël përballë turmës. Në fund të mbrojtjes, Genc Gjokutaj kërkoi pafajësi për ish-komandantin e gardës Ndrea Prendi.

Ndësa një javë më parë u dha pretenca e Prokurorisë, e cila kërkoi 48 vjet burg për dy prej të akuzuarve kryesorë për ngjarjet e 21 janarit në bulevardin “Dëshmorët e Kombit”, ku mbetën të vrarë 4 demonstrues.

Organi i akuzës pretendon se gardistët kanë qëlluar drejtpërdrejt mbi demonstruesit dhe për këtë arsye ka kërkuar 23 vjet burg për ish-shefin e Gardës së Republikës, Ndrea Prendi, i akuzuar për vrasjen e demonstruesit Faik Myrtaj dhe 25 vjet burg për ish-gardistin Agim Llupo, duke e cilësuar fajtor për vrasjen e Ziver Veizit dhe Hekuran Dedës, ndërsa e vetmja vrasje ende e pazbardhur e protestës së 21 Janarit është ajo e Aleks Nikës, për të cilën Prokuroria ka theksuar se është akoma në hetim.

HermesNews - ©2013

Dërgo me email | Stampo artikullin