04/02/2013 09:30:02

Komisioneri i BE-së në Tiranë për të bindur politikën të ulë armët

'Statusi i vendit kandidat për Shqipërinë është i arritshëm. Iu takon politikanëve shqiptarë ta bëjnë këtë realitet'

(17:00) “Miratimi dhe hyrja në fuqi e tre ligjeve në janar të vitit 2014, mund të kontribuojnë drejt një zgjidhje”. Kështu është shprehur sot, deputeti socialist, Arben Malaj, duke marrë shkas nga vizita e Komisionerit për Zgjerim të BE-së në vendin tonë, Stefan Fyle. Më tej në qëndrimin e tij, nëpërmjet një deklarate për mediat, Malaj ka vlerësuar vizitën e z. Fyle në Tiranë si “një mundësi reale për të negociuar me durim dhe përgjegjësi për një zgjidhje, duke fituar kohën e humbur në procesin e integrimit”.

Ndërsa lidhur me ndikimin e mundshëm të komisionerit Fyle në zgjidhjen e situatës për votimin e 3 ligjeve, Malaj tha “se më shumë se deklaratat, as vizita e Fyles nuk e ndryshon qëndrimin e PS-së. Suksesi apo dështimi i kësaj vizite, nuk është suksesi apo dështimi i komisionerit Fyle, por suksesi apo dështimi i politikës shqiptare në raport me sfidat e vendit”./b.k/ /m.m/


(13:00) Komisioneri për Zgjerimin në BE, Stefan Fyle, pas vizitës së sotme në Tiranë, deklaroi se proçesi i reformave që lidhet me proçesin e integrimit në BE duhet të jetë i qëndrueshëm, përfshirës dhe i udhëhequr nga konsensusi, në të mirë të qytetarëve. Ai nënvizoi se zhvillimi i suksesshëm i zgjedhjeve parlamentare do të jetë një test kyç për funksionimin e mirë të institucioneve demokratike të vendit.

Zyra e shtypit e BE-së në Tiranë njofton se në takimet me Presidentin Bujar Nishani, kryeministrin Sali Berisha dhe Kryetarin e Partisë Socialiste, Edi Rama, komisioneri Fyle pati shkëmbime të hapura dhe të sinqerta me politikanët shqiptarë rreth prioriteteve të tyre përsa i përket aspiratave të vendit për integrim në BE.

"Ai u nënvizoi partnerëve të tij që statusi i vendit kandidat për Shqipërinë është i arritshëm. Iu takon politikanëve shqiptarë ta bëjnë këtë realitet". Komisioneri Fyle përsëriti që KE është i vendosur të forcojë më tej proçesin e integrimit të Shqipërisë drejt BE-së. "I tërë proçesi i reformave që kanë të bëjnë me proçesin e integrimit në Bashkimin Europian duhet të jetë i qëndrueshëm, përfshirës dhe i udhëhequr nga konsensusi- në të mirë të të gjithë qytetarëve shqiptarë," tha Komisioneri Fyle pas takimeve të tij.

Komisioneri nënvizoi, gjatë bisedimeve të tij në Tiranë, se zhvillimi i suksesshëm i zgjedhjeve parlamentare të 2013-s do të jetë një test kyç për funksionimin e mirë të institucioneve demokratike të vendit. Ai u bëri thirrje politikanëve të zhvillojnë zgjedhjet e qershorit në përputhje me standardet ndërkombëtare, të përmirësojnë besueshmërinë dhe reputacionin e institucioneve demokratike dhe të forcojnë përgjegjshmërinë e politikanëve kundrejt qytetarëve shqiptarë. Komisioneri i diskutoi këto çështje edhe me komunitetin ndërkombëtar në Shqipëri, përfshirë edhe përfaqësuesit e OSBE-së.


(10:30) Komisioneri për Zgjerimin në Bashkimin Europian (BE), Stefan Fyle, në kuadër të vizitës që po zhvillon në Tiranë, ka përfundur takimin me ambasadorët e vendeve të BE-së, të akredituar në Shqipëri, ndërsa po zhvillon takimin me ambasadorin amerikan, AleksandërArvizu dhe ambasadorin e OSBE-së, Eugen Wollfarth.

Në një prononcim për mediat pas takimit, ambasadori i Mbretërisë së Holandës në Tiranë, Martin de la Beij u shpreh se "takimi me Fylen u përqëndrua tek zgjedhjet dhe integrimi i Shqipërisë. Nuk e di nëse Fyle do i propozojë ndonjë zgjidhje Edi Ramës dhe Sali Berishës."

Eurokomisioneri Stefan Fyle nga dje ndodhet në Tiranë në kuadër të përpjekjeve për të gjetur një rrugëzgjidhje për miratimin në parlament të tre drafteve të përcaktuara nga Brukseli si kusht për marrjen e statusit të vendit kandidat.

Gjatë kësaj vizite, komisioneri Fyle do të takohet edhe me kryeministrin Sali Berisha, kryetarin e Partisë Socialiste Edi Rama dhe Presidentin e Republikës, Bujar Nishani.


(10:00) FILLON TAKIMI I KOMISIONERIT STEFAN FYLE ME AMBASADORIN AMERIKAN ALEKSANDËR ARVIZU DHE ATË TË OSBE, EUGEN WOLLFARTH.


TIRANË - Komisioneri i Bashkimit Europian për Zgjerimin, Stefan Fyle, në vizitën e tij zyrtare sot në Tiranë do të zhvillojë takimet me dy liderët kryesore të PD dhe PS-së, në përpjekje për gjetjen e një rrugëzgjidhjeje për miratimin në parlament të tre ligjeve të përcaktuara nga KE si kusht për marrjen e statusit të vendit kandidat.

Komisioneri Fyle do të takohet fillimisht me ambasadorët e BE dhe të OSBE në Tiranë, e më pas të do të vijojë takimet me drejtuesit kryesorë të politikës.

Gjithashtu është parashikuar që rreth orës 10:45 Fyle të takohet me Kryeministrin Sali Berisha, për t'u pasur me takimin mes tij dhe liderit të opozitës, Edi Rama, takim që pritet të zhvillohet rreth orës 12:05.

Pas përfundimit të këtyre takimeve Fyle pritet të takojë dhe Presidentin Bujar Nishani.

Pak ditë më parë, në një mesazh në rrjetin social Twitter, mbi situatën në Shqipëri, Fyle është shprehur se “zgjedhjet në Shqipëri janë shumë të rëndësishme, por nuk mund të zgjidhin çështjet kritike që janë kultura e kompromisit dhe mungesa e gjithëpërfshirjes”.

HermesNews - ©2013

Dërgo me email | Stampo artikullin