30/01/2013 15:37:47

Drejt fundit proçesi i 21 Janarit

Prokuroria kërkon 23 vjet burg për ish- drejtuesin e Gardës së Republikes, Ndrea Prendi dhe 25 vjet burg për ish- efektivin e Gardës, Agim Llupo

TIRANË - Proçesi për ngjarjet e "21 janarit" në Gjykatën e Shkallës së Parë, në Tiranë, po shkon drejt fundit. Pas 38 seancash gjyqësore, prokuroria dha sot pretencën për të pandehurit në këtë proces.

Para trupit gjykues, të kryesuar nga gjyqtari Besnik Hoxha, prokuroria kërkoi shpalljen fajtor dhe dënimin me 23 vjet burg për ish- drejtuesin e Gardës së Republikes, Ndrea Prendi dhe 25 vjet burg për ish- efektivin e Gardës, Agim Llupo, për veprën penale të vrasjes gjatë zhvillimit të demonstratës së opozitës në 21 janar para Kryeministrisë.

Sikurse pretendoi prokuroria, ne seancen e mbajtur nen masa të rrepta sigurie, dy të pandehurit kanë qëlluar direkt mbi demonstruesit. Ndërkohë që në deklarimet e tij në seancë, ish-kreu i Gardës, Ndrea Prendi, ka kundërshtuar akuzën e ngritur ndaj tij nga prokuroria.

Prendi ka deklaruar se ai dhe grupet e gardistëve që drejtonte atë ditë, kryen vetëm detyrën për mbrojtjen e Kryeministrisë. Sikurse u pohua prej tij, u qëllua në ajër me armë me fishekë luftarake, kur mbaruan ata të manovrës, në momentin që, sipas Prendit, situata u bë shumë e dhunshme dhe rrezikohej jeta si e gardistëve, ashtu edhe e personaliteteve shteterore.

Po të njëjtin qendrim ka mbajtur në proces edhe i akuzuari tjetër, Agim Llupo, i cili është i vetmi në këtë proces, i proceduar nën masën e sigurisë së "arrestit me burg". Në seancën e zhvilluar sot, Prokuroria deklaroi se është tërhequr nga akuza ndaj shoferit të Prendit, Margarit Kume, i cili u dyshua për veprime që pengojne zbardhjen e së vertetes. Sipas prokurorise, akuza ndaj Kumes nuk është vertetuar.

Pretenca e prokurorisë vjen pas 38 seancash gjyqesore, zhvilluar ne Gjykaten e Tiranes, ku u paraqitën provat me dëshmitarë dhe provat shkresore te paleve. Shqyrtimi i ketyre provave është mbyllur nje seance me parë me dilemën e madhe lidhur me vrasjen e shtetasit Ziver Veizit.

Dy ekspertë të thirrur nga Gjykata, për të analizuar dëmtimin e predhës që u gjet në trupin e Veizit, kanë dhënë konkluzione të kundërta. Eksperti i palës mbrojtese, ka pretenduar se plumbi ka ndeshur diku tjetër para trupit të viktimës, duke qenë rikoshet. Ndërsa specialisti tjetër përjashton në mënyrë kategorike mendimin e kolegut, duke pretenduar se vrasja ka qenë direkt dhe plumbi mund të jetë dëmtuar në kockat e Ziver Veizit, pasi ka gjurmë të tilla në predhën e gjetur në organizmin e viktimës.

Si i akuzuar në këtë proces ishte edhe specialisti i IT-së në Kryeministri, Amando Kasaj, i cili u dyshua për fshirjen e pamjeve filmike të 21 janarit nga serveri i Kryeministrisë. Në 23 korrik te vitit te kaluar, Gjykata e Tiranes rrëzoi akuzën e ngritur ndaj Kasajt, duke e shpallur atë të pafajshëm, vendim ky i lënë në fuqi dhe nga Gjykata e Apelit.

Me dhënien e pretencës së prokurorise për ngjarjet e 21 janarit, proces i hapur që prej majit të 2012 ne Gjykatën e Shkallës së Parë, po i afrohet fundit. Ne seancen e ardhshme do te japë konkluzionet e saj pala mbrojtese, e me pas Gjykata do të shpallë verdiktin.

Në protestën e dhunshme të opozitës në 21 janar 2011 para selisë së Kryeministrisë, ku pati sulme, përleshje e konfrontime fizike mes forcave të sigurise dhe protestuesve, mbetën të vrarë me armë zjarri katër protestues, Ziver Veizi, Aleks Nika, Faik Myrtaj dhe Hekuran Deda. Ndersa, pati edhe shumë të plagosur, mes tyre protestues dhe punonjës policie.

HermesNews - ©2013

Dërgo me email | Stampo artikullin