29/01/2013 18:07:09

Drejt falimentimit ujesjellesi ne Kukes

Ritmet e punimeve për ndërtimin e ujësjellësit të ri vazhdojnë të jenë mjaft të ngadalta

KUKES - Rreth 30 mijë konsumatorë të qytetit të Kukësit dhe fshatrave përreth kane veshtiresi ne furnizimin me uje te pijshem. Situata po vështirësohet në këtë periudhë si pasojë e vështirësive financiare me të cilat po përballet ndërmarrja e ujësjellësit si rezultat i nivelit mjaft të ulët të arkëtimeve nga konsumatori, gjë që e ka cuar këtë ndërmarrje drejt falimentimit.

“Ndërmarrja është në vështirësi edhe për të shlyer pagat e punonjësve. Aktualisht paguajnë faturën e ujit të pijshëm vetëm 20 për qind e konsumatorëve familjarë, 60 për qind e konsumatorit privat dhe 70 për qind e konsumatorit shtetëror”, bëri të ditur kryetari i bashkisë së Kukësit, Hasan Halilaj.

Për shkak të rrjetit të amortizuar janë rritur vështirësitë e furnizimit të konsumatorëve me ujë të pijshëm, aq sa edhe gjatë dimrit konsumatori po furnizohet me ujë të pijshëm vetëm 3 - 4 orë në ditë. Kjo ka bere që edhe gjatë periudhës së dimrit në hyrje te pallateve të vazhdojnë të jenë të instaluara pompat e ujit që mundësojnë përmirësimin e furnizimit të konsumatorëve me ujë të pijshëm.

Ritmet e punimeve për ndërtimin e ujësjellësit të ri vazhdojnë të jenë mjaft të ngadalta. Punimet për ndërtimin e këtij ujësjellësi me një fond prej 3,5 milion euro nisën që në vitin 2010, por ato o zvarriten pafundësisht.

HermesNews - ©2013

Dërgo me email | Stampo artikullin