25/01/2013 05:52:57

Bizneset rrisin kërkesat për kredi

Përqindja neto e bankave që kanë perceptuar rritje të kërkesës për kredi rezultoi 6.3% nga -4.9% që ishte në tremujorin e mëparshëm

TIRANE - Në tremujorin e katërt të vitit 2012, vlerësimi i ekspertëve të bankave për kërkesën e bizneseve për kredi është përmirësuar ndjeshëm krahasuar me tremujorin e tretë. Përqindja neto e bankave që kanë perceptuar rritje të kërkesës për kredi rezultoi 6.3% nga -4.9% që ishte në tremujorin e mëparshëm.

Ky zhvillim, megjithëse në një masë më të ulët, është në të njëjtin drejtim me pritjet e ekspertëve bankarë për kërkesën për kredi, të shprehura në vrojtimin e tremujorit të tretë, 2012.

Përmirësim më të dukshëm shënoi kërkesa për kredi nga ndërmarrjet e vogla dhe të mesme, balanca neto e saj shënoi nivelin 27.1%, duke qenë në përmirësim me rreth 29.8 pikë përqindje krahasuar me tremujorin e kaluar.

Banka Qendrore vëren se dhe kërkesa për kredi nga ndërmarrjet e mëdha u vlerësua pozitivisht, në nivelin 4.3%, në rritje me rreth 19.6 pikë përqindje, në krahasim me periudhën e mëparshme. Të ndara sipas kërkesës së bizneseve për kredi, kërkesa për kredi me qëllim financimin e investimeve fikse vijoi të vlerësohet negativisht edhe gjatë tremujorit të katërt të vitit 2012.

Ndërkohë, kërkesa për financimin e kapitalit qarkullues ka vijuar të vlerësohet në rritje. Ekspertët vlerësojnë SE kontributin kryesor e kanë dhënë nevoja për financimin e kapitalit qarkullues dhe kushtet e kreditimit.

HermesNews - ©2013

Dërgo me email | Stampo artikullin