18/01/2013 10:52:52

Greqi, hetim ish ministrave te financave. Parlamenti jep OK

Ekzistojnë dyshime se Papakonstantinu i ka fshirë emrat e tre familjarëve të tij nga lista me pronarë të llogarive bankare në vendet e huaja për të cilët dyshohet se kanë fshehur tatimet

ATHINË - Parlamenti grek miratoi fillimin e hetimit penal kundër ish-ministrit të Financave, Jorgos Papakonstantinu për përfshirje në skandalin me "listën Lagarde". Ekzistojnë dyshime se Papakonstantinu i ka fshirë emrat e tre familjarëve të tij nga lista me pronarë të llogarive bankare në vendet e huaja për të cilët dyshohet se kanë fshehur tatimet.

Njëkohësisht, kërkesa e opozitës që në hetim të përfshihet edhe ish-ministri i Financave Evangjelos Venizelos, i cili për momentin është lider i njërës prej partive qeveritare PASOK, u refuzua. Parlamenti nuk pranoi edhe kërkesat për hetim kundër ish-kryeministrave Lukas Papadhimos dhe Jorgos Papandreu.

Në vitin 2010, autoritetet franceze kanë dorëzuar te Papakonstantinu një listë, e marrë nga banka HSBC, me të dhëna për llogari të rreth 2 000 grekëve në Zvicër, të cilët duhej të hetoheshin për shkak të fshehjes së mundshme të tatimeve, por zyrtarët grekë nuk reaguan.

Muajin e kaluar, Athina sërish kërkoi kopje nga lista, me çka u konfirmua se emrat e tre familjarëve të ish-ministrit të Financave ishin hequr nga kopja fillestare. Papakonstantinu, i cili ishte ministër i Financave në periudhën 2009-11 hodhi poshtë akuzat duke pohuar se nuk ka kryer kurrfarë ndryshimesh në këtë listë.

HermesNews - ©2013

Dërgo me email | Stampo artikullin