16/01/2013 17:09:17

Celet Forumi i Davosit

Kina dhe SHBA-ja nuk do të jenë të pranishme në këtë nivel këtë vit për shkak të ndryshimeve të qeverisë në Pekin dhe fillimit të mandatit të dytë të Barack Obamës

GJENEVË - Angela Merkel, David Cameron dhe Dmitri Medvedev do të jenë ndër liderët e pranishëm të Forumit Ekonomik Botëror (WEF) në Davos, që do të zhvillohet gjatë periudhës 23-27 janar, u shpreh sot në Gjenevë, Klaus Schwab, president themelues i forumit.

"Bashkë me kancelaren gjermane, kryeministrin britanik dhe atë rus, forumi do të presë në total rreth 50 krerë shtetesh dhe qeverie", deklaroi Klaus Schwab.

Megjithatë Kina dhe SHBA-ja nuk do të jenë të pranishme në këtë nivel këtë vit për shkak të ndryshimeve të qeverisë në Pekin dhe fillimit të mandatit të dytë të Barack Obamës.

Forumi Ekonomik Botëror në Davos, që do të mbledhë gjatë periudhës 23-27 janar liderët më të mëdhenj në këtë stacion sportesh dimërore në Zvicër, përqëndrohet në temën "Dinamizmi solid".

Sekretari i Përgjithshëm i OKB-së, Ban Ki-Moon dhe presidenti i Bankës Botërore, Jim Yong Kim, Christine Lagarde, drejtoresha e Përgjithshme e Fondit Monetar Ndërkombëtar, Mario Draghi, presidenti i Bankës Qendrore Evropiane (BQE) figurojnë gjithashtu ndër liderët e njohur të forumit.

HermesNews - ©2013

Dërgo me email | Stampo artikullin