14/01/2013 18:07:49

'Gerdeci', vendimi i Gjykates me 4 Shkurt

Datën e caktoi në përfundimi të gjykimit relatori i çështjes Alaudin Malaj

TIRANË - Gjykata e Apelit ka mbyllur shqyrtimin gjyqësor për çështjen “Gërdeci”, dhe caktoi datën 4 shkurt si ditën kur do të shpallë vendimin. Datën e caktoi në përfundimi të gjykimit relatori i çështjes Alaudin Malaj.

Në seancën e zhvilluar të hënën u dëgjuan pretendimet e palës mbrojtese, ndër to të ish-shefit te Shtabit te Pergjithshëm, Luan Hoxha. Brahim Lahi, avokati mbrojtës i Luan Hoxhës, kërkoi pushimin e çështjes ndaj klientit të tij me pretendimin se, nuk provohet qe ai të ketë kryer ndonjë vepër penale.

Gjykata e Shkallës së Parë dha më 12 mars të vitit të kaluar vendimin për 29 të akuzuarit e çështjes, në pjesën më të madhe ish- funksionarë të ministrisë së Mbrojtjes dhe Ushtrisë.

Gjykata e Tiranës shpalli vendimin për të pandehurit e procesit, duke dënuar me nga 18 vjet burg ish-kreun e MEICO-s,Ylli Pinari dhe ish-drejtorin e Fabrikës, Dritan Minxolli dhe me 10 vjet burg ish-administratorin shqiptar të "Albademil" sh.p.k, Mihal Delijorgjin.

Ndërkohë që me 10 vjet burg u dënua ish-zyrtari i Ministrisë së Mbrojtjes, Sokol Ngjeçi, dhe me 6 vjet heqje lirie, bashkë me 4 vjet të tjera moslejim për ushtrim të detyrës, ish-shefi i Shtabit të Përgjithshëm të Ushtrisë, Luan Hoxha. Të pandehurit e tjerë u dënuan me masa më të lehta dënimi, ndërsa disa u shpallën të pafajshëm.

HermesNews - ©2013

Dërgo me email | Stampo artikullin