08/01/2013 08:50:25

Rriten me 0,9 % çmimet e konsumit

Indeksi i çmimeve të konsumit Dhjetor 2012

INSTAT - Çmimet e konsumit në muajin Dhjetor shënuan një rritje prej 0.9 përqind krahasuar me muajin e mëparshëm. Ndryshimi vjetor i indeksit në muajin Dhjetor (Dhjetor 2012 / Dhjetor 2011) është 2.4 përqind. Një vit më parë ky ndryshim ishte 1.7 përqind. Krahasuar me muajin e mëparshëm:

Indeksi i grupit "Ushqime dhe pije jo alkoolike" shënoi një rritje prej 2.4 përqind. Rritja më e madhe prej 20.4 përqind vërehet në nëgrupin "zarzavate përfshirë patatet". Ndërsa Çmimet në nëngrupin "fruta" shënuan një rritje prej 0.3 përqind. Çmimet janë rritur edhe në disa nëngrupe të tjera të grupit të ushqimeve, ku mund të përmendim rritjet në nëngrupin "qumësht, djath e vezë" me 0.9 përqind, kafe, çaj e kakao me 0.5 përqind, etj.

Indeksi i grupit "Pije alkoolike dhe duhan" ka shënuar një rritje prej 0.3 përqind, brenda këtij grupi çmimet e pijeve alkoolike shënuan një rritje prej 0.5 përqind dhe çmimi i duhanit një rritje prej 0.2 përqind.Indeksi i grupit "Veshje dhe këpucë" ka shënuar një ulje prej 0.2 përqind. Indeksi i grupit "Shëndeti " shënoi një ulje prej 0.2 përqind, ku mund të veçojmë uljen e çmimeve të medikamenteve me 0.3 përqind.

Indeksi i grupit "Transporti" ka shënuar një rritje prej 0.1 përqind. Brenda këtij grupi çmimi i naftës shënoi një ulje prej 0.1 përqind dhe çmimi i benzinës një ulje prej 0.2 përqind. Indeksi i grupit "Komunikimi" ka shënuar një rritje prej 1.5 përqind, rritje kjo që ka ardhur si rezultat i rritjes së disa tarifave te telefonisë celulare me 2.4 përqind. Indeksi i grupit "Mallra dhe shërbime të tjera" ka shënuar një ulje prej 4.2 përqind, ulje kjo që ka ardhur kryesisht si rezultat i uljes së tarifave të siguracionit të automjeteve me 31.1 përqind.

Në grupet e tjera ndryshimet variojne nga + 0.1 përqind në + 0.6 përqind.

HermesNews - ©2013

Dërgo me email | Stampo artikullin