22/09/2014 12:16:08

Ndahet nga jeta Besa Imami

Personalitete të larta të vendit shprehën sot vlerësime për kontributin që aktorja Besa Imami

TIRANE - Aktorja e njohur e skenës shqiptare, Besa Imami, ndërroi jetë mbrëmjen e djeshme, pasi vuante prej kohësh nga një sëmundje e rëndë. Homazhet në nderim të aktores Imami do të zhvillohen nga ora 13:00-14:00, në ambientet e Teatrit Kombëtar në Tiranë. Personalitete të larta të vendit shprehën sot vlerësime për kontributin që aktorja Besa Imami, “Artiste e Meritur” , ka dhënë për teatrin dhe kinematografinë shqiptare. Kryeministri Edi Rama, në një postim në rrjetin social Facebook shkruan ” Besa Imami ishte edhe një nga hijet e larta të kohës së vjetër kur me Arturin i shijonim byrekun e i dëgjonim kritikat!I lehtë i qoftë dheu”. Ndërsa Presidenti Bujar Nishani në një mesazh ngushëllimi drejtuar familjarëve të aktores Besa Imami, thekson se “Besa do mbahet mend gjithmonë, se e vuri qenien e jetës së saj në shërbim të teatrit dhe kinematografisë shqiptare, duke u bërë një nga figurat më të shquara në këto dy gjini artistike”. “Kam ndjerë një trishtim të thellë dje, kur mora vesh për ndarjen nga jeta të njeriut tuaj më të dashur, aktores së madhe Besa Imami. Ky lajm më ka prekur jashtëzakonisht thellë dhe është një humbje e madhe për kulturën shqiptare në përgjithësi, teatrin në veçanti dhe gjithë shoqërinë shqiptare”, shprehet Nishani.

HermesNews - ©2014

Dërgo me email | Stampo artikullin