18/12/2013 15:47:46

Gazetarët që u nderuan me çmime për karrierën dhe 'Vangjush Gambeta'

Në emër të komunitetit të gazetarëve shqiptarë, si Unioni i Gazetarëve Shqiptarë, Shoqata e Gazetarëve Profesionistë të Shqipërisë, Lidhja e Gazetarëve të Shqipërisë si dhe Forumi i Mediave të Lira, iu akordua mjeshtërit të madh të gazetarisë, ''Penës së Artë'', Dritëro Agollit

TIRANË - Personalitete të njohura nga gazetaria ekonomike, por edhe personazhe që i njohim më herët nga ekrani i Tvsh-së, apo edhe shkrimtari dhe publicisti i mirënjohur Dritëro Agolli, janë vlerësuar sot në mesditë në edicionin e pestë të çmimeve “Karriera” si dhe çmimit “Vangjush Gambeta”, në një event të organizuar nga Unioni i Gazetarëve Shqiptarë në mjediset e hotelit “Tirana International”, në praninë e politikanëve shqiptarë, kolegëve, miqve dhe të afërmve të tyre.

"Një veprimtari që kurorëzon inkurajimin e gazetarëve të ekonomisë në Republikën e Shqipërisë, e tashmë në vitin e pestë të saj në zgjerimin e perimetrit të saj administrativ duke përfshirë gazetarët nga Kosova dhe Maqedonia”, tha në fjalën e hapjes drejtuesi i Unionit të Gazetarëve Shqiptarë, Aleksandër Çipa.

“Personalitet i papërsëritshëm i gazetarisë dhe publicistikës, me një kontribut madhor në shtypin shqiptar për dekada me radhë. Sjellës i një kulture shkrimore të re dhe pasuruese i mendimtarisë publicistike në hapësirën kombëtare shqiptare. Lëvrues i zhanreve të ndryshme në gazetarinë e shkruar...”, citohej ndër të tjerash në motivacionin akorduar Dritëro Agollit, e dorëzuar mbesës së tij Ana Agolli, - një trofe i dhuruar nga Kryetari i Parlamentit, Ilir Meta.

Çipa gjatë këtij eventi bëri të ditur çmimin “Karriera”, akorduar Filip Çakulit, që sipas Çipës referuar motivacionit, “Një personalitet i fuqishëm në gazetarinë shqiptare në disa dekada. Përfaqësues më i shquar i kurajës gazetareske në periudhën e tranzicionit post-komunist shqiptar, si dhe drejtues më i guximshëm i emisionit më të suksesshëm investigativ Fiks Fare në 10-vitet e fundit”, tha ndër të tjerash Çipa, duke përmendur më tej referencat si gazetar i fjalës së shkruar dhe përvojën e tij si një “shkollë më vete”.

Çipa i akordoi moderatores, gazetares dhe koleges Tefta Radi çmimin “Karriera”, duke cituar motivacionin e saj si një, “spikere e modelit të shkëlqyer komunikues në ekranin publik shqiptar dhe profesioniste që ka ndikuar mbi gjeneratat e reja të moderimit televiziv shqiptar përgjatë 30-viteve të fundit”.

Një tjetër çmim për gazetarët ekonomike, si çmimi i mirënjohur “Vangjush Gambeta”, u prezantua dhe u moderua nga Bardhi Sejdarasi, i cili gjatë fjalës së tij theksoi “prurjet e mëdha të artikujve dhe analizave ekonomike përgjatë një viti”.

Në emër të Unionit të Gazetarëve Shqiptarë ai akordoi certifikatën “Vangjush Gambeta” gazetarit Zekeria Shabani, për raportimin më të mirë ekonomik në shtypin e shkruar në Kosovë si dhe Zejnullah Veslit me të njëjtin motivacion, por në shtypin e shkruar të Maqedonisë.

Po ashtu, Sejdarasi bëri të ditur edhe akordimin e çmimit “Vangjush Gambeta”, gazetares të televizionit “AS”, Teuta Shamko për raportimin më të mirë televiziv si dhe Kreshnik Martinajt dhe Alban Beqjas, një çmim i akorduar këtij të fundit, nga Drejtori i Përgjithshëm i ATSH-së, z. Gëzim Podgorica. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin