18/12/2013 09:59:00

Supa franceze

nga Brunhilda Çela

Sekretet e aromave të Brunhildës Sot djali i vogël me kishte premtuar që unë nuk do bëja asgjë, vetëm të ç'plodhesha e ai do gatuaj për sot. Më bëri listën e të gjithë përbëresve që i duheshin dje dhe unë ia vendosa në frigorifer (foto).

Sot në mëngjes filloi me gatimet në orën 9 e rreth orës dy e hengrëm drekën. Menuja e tij për sot ishte supa franceze me qepe: një supë që e kishin bërë në shkollë.

E kishte me shumë qejf pasi i kishte pëlqyer shumë. E filloi me përgatitjen e bouillonit blanc (lëngu i mishit jo i errët) i cili zgjati rreth 3 orë në përgatitje por doli një lëng i përsosur me plot shije.

Ju mund të merrni dhe bouillon të gatshëm por do ju këshilloja ta bëni vetë, lëngu i mishit i përgatitur vetë jo vetëm ka shije të mirë por është i shëndetshëm sidomos për fëmijët e vegjël, nëse do ju nevojitet receta e bouillonit sipas asaj që përgatiti im bir, me kënaqësi do jua jap e do ua shpjegoj në një album të veçantë pasi ai do që ketë lëng ta përgatisi vetë një herë në javë e të na ndodhet për çdo përgatitje që do na duhet.

Receta e supës për 6 racione:
450 gr qepë
80 gr gjalpë ose vaj
1,7 l bouillon viçi
6 copa bukë të bardhë ose baguette të prera në forma sipas dëshirës
150 gr djath (edamer përdori im bir ju mund të përdorni dhe djath tjetër sipas dëshirës)
pak miell rreth 1 lugë gjelle
pak trumëz
2 -3 thelba hudhër
kripë, piper
verë madeira mund të merrni një verë të bardhë sipas deshires suaj.


Përgatitja/ Qepët i pret në feta të holla (Julienne), i vë të skuqen lehtë në një tenxhere ku kemi vënë gjalpin të nxehet. I skuqim duke i përzier jo në temperaturë të lartë dhe duke qëndruar aty rreth 15 minuta por jo të digjen, të marrin një ngjyrë të artë, pastaj shtojmë dhe hudhrat e prera imët dhe miellin.

Vazhdojmë nja dy minuta kavërdisjen dhe e shuajmë me lëngun e mishit dhe verën. E lëmë të ziejë reth 15 deri 20 minuta dhe e rregullojmë me kripë, me piper të bardhë mundësisht, pak trumëz të thatë dhe e lëmë të marre ca valv.

Bukën e kemi prerë sipas formës së deëshiruar dhe e skuqim lehtë në tigan pa vaj ose më pak gjalpë. Supën e hedhim në tasat që janë apostafat për këtë lloj supe tasa që durojnë pjekjen në furrë.

Mbi supe vëmë copën e bukës dhe djathin e grirë, e fusim në furrë të gratinohet vetëm lart pra vetëm me temperarurë nga lart. I japim një faqe, djali preferoi mos të merrte shumë ngjyrë por ju mund ta bëni sipas dëshirës. Mund t'i vëmë një degë të freskët trumezë për zbukurim lart, ne nuk patëm se është prishur nga i ftohti por na u gjend rozmarina dhe e zbukuruam me ca dega rozmarinë. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin