11/12/2013 14:53:37

Kur njihesh në internet: vazhdon udhëtimi nëpër Shqipëri

Pas shfaqjeve në Fier, Korçë, Vlorë, Elbasan, komedia do të shfaqet pasditen e sotme në qytetin e Pogradecit, ndërkohë që të premten, 13 dhjetor dhe të dielën, 15 dhjetor, ajo do të ngjitet në skenën e Teatrit ''Migjeni'' në Shkodër

TIRANË - “Kur njihesh në internet”, komedia me regji të Kiço Londos vazhdon udhëtimin nëpër Shqipëria. Pas shfaqjeve në Fier, Korçë, Vlorë, Elbasan, komedia do të shfaqet pasditen e sotme në qytetin e Pogradecit, ndërkohë që të premten, 13 dhjetor dhe të dielën, 15 dhjetor, ajo do të ngjitet në skenën e Teatrit “Migjeni” në Shkodër.

Në janar të vitit që vjen, “Kur njihesh në internet”, do të ndalojë në Tiranë, për publikun e kryeqytetit. Kështu ka deklarur sot, regjisori Londo, i cili zgjodhi që edhe konferencën për shtyp të kësaj shfaqjeve mos ta kufizojë brenda një ndërtese, por ta zhvillojë, sëbashku me aktorët, pranë Pemës së Krishtlindjeve, në qendër të Tiranës.

Projekti i fundit i Teatrit Shëtitës është një komedi e anglezit Ray Cooney, i njohur si mjeshtri i farsës. “Kur njihesh në internet”, është një farsë e shpejtë komike, brilante me telashe që vetëm shtohen dhe situata që dalin jashtë kontrollit... Interpetojnë aktorët, Roland Saro, Visjan Ukcenaj, Xhevahir Zeneli, Ermira Hysaj, Esela Pysqyli, Alesia Xhemalaj, Ergys Çekrezi.

Nëse mendoni se jeta juaj është e komplikuar mendoni si është ajo e shoferit të taxis Xhon Smith që jeton paralelisht në dy familje. Kjo situatë ka tërhequr publikun e qyteteve ku është shfaqur komedia, për të ndjekur nga afër jetën e nderlikuar të Xhonit.

Personazhi kryesor, Xhon Smith i tmerruar është në një lëvizje frenetike të vazhdueshme për të mbajtur atë që nuk mban dot më, sekretin e dy familjeve paralele. Teknologjia është më e fortë se deshira e individit. Xhoni vrapon sikur dëshiron të kap kohën e humbur, të fshijë me një gomë magjike nëpërmjet gënjeshtrave bajate dhe situatave të komplikuara jetën e tij të deritanishme. Por këto situata riprodhohen mbrenda tyre pikërsht sepse mënyra se si janë ngjizur është e pamundur të prodhoj tani më fenomene në favor të Xhonit. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin