04/12/2013 11:40:35

Biskota me mjaltë

nga Brunhilda Çela

Sekretet e aromave të Brunhildës Receta për këto biskota të thjeshta dhe shumë të shijshme është: 600 - 700 g miell këtë shikojeni vet sa të zihet një brum i mirë pasi unë me sy e zura nuk kam një masë të saktë.
- 250 ml vaj ose gjalpë të tretur, unë përdora vaj
- 100 g sheqer
- 3 vezë
- 150 gr mjaltë (unë kisha mjaltë lulesh të aromatizuar me kanellë)
- 1 lugë çaji sode buke
- 1 lugë gjelle jo plot me majë kanellë dhe 1 lugë kafeje karafil pluhur

Për zbukurimet nëse do doni t'i zbukuroni, merrni:
- 1 të bardhë veze
- 100-200 gr sheqer pluhur
- pak lëng limoni
- copa qershish gllase (këto shiten të gatshme) dhe bajame të plota të bardha nëse doni t'i zbukuroni më tepër.

Por mund t'i zbukuroni dhe me çokollatë të bardhë të tretur ose me çokollatë të zezë. Zbukurimet lart sipas fantazisë suaj.

I piqni në furrë me temperaturë 180 gradë rreth 12 minuta mjafton, jo të nxihen shumë. Mund t'i lyeni me furçë me pak qumësht para se t'i piqni marrin pak shkëlqim.

Në fillim do rrihni sheqerin me vezët, vajin dhe mjaltin. Miellin e përzieni me erëzat dhe sodën. I përzieni të dyja masat dhe zini një brum. Unë e futa në qese plastike dhe e lashë ca në frigorifer.

Me këtë masë mund të bëni dhe shtëpitë e bukura që bëhen për Krishtlindje, por tamam tamam për këto lloj biskotash që këtu në Austri quhen Lebkuchen kam një recetë tjetër shumë më të rafinuar, që kërkon më tepër erëza dhe do miell të zi thekre.

Atë recetë e kam nxjerrë tek libri im i gatimit, ato që e kanë le ta shohin e ta provojnë pasi ishte nje recete që e bëj çdo vit dhe është shumë e mirë. Dalin jashtëzakonisht të shijshme.

Brumi i tyre zihet në darkë, vihet në frigorifer e të nesërmen piqet. Ato do i bëj këto ditë e do i nxjerr përsëri. Tani mjaftohuni me këtë recetë të thjeshtë. Mund t'i shtoni dhe bajame të bluara brenda kësaj recetë dhe aq sa bajame do i fusni aq miell do zbrisni nga receta. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin