25/11/2013 16:42:10

Engjëjt janë larg

Fillojnë xhirimet e filmit të Gjergj Xhuvanit

TIRANË - Filmi “Engjëjt janë larg”, historia e dashurisë mes një serbi dhe një shqiptareje gjatë luftës së fundit në Kosovë fillon sot, xhirimet nën regjinë e Gjergj Xhuvanit.

Projekti bazuar në romanin me titull, "Dashuria dhe rreckat e kohës" i autores Anilda Ibrahimi, fitoi në vitin 2011 financimin nga QKK dhe sipas një njoftimi nga ky institucion, pas dy vjetësh në letër, ky projekt do të mund të realizohet. Fokusi i regjisorit, është një tjetër histori e dhimbshme dhe emocionale dashurie.

Sipas QKK-së, në dhjetor pritet të shfaqet premiera e filmit “Amaneti” me regji të Namik Ajazit. Edhe këtij produksioni i është dashur 3 vite për të pritur realizimin pas shpalljes së tij fitues nga QKK.

Filmi me skenar të Ruzhdi Pulahës i zhvendos ngjarjet në vitin 1982 fill pas goditjes më të fundit në strukturat më të larta të udhëheqjes së kohës dhe organeve të Ministrisë së Brendshme. Është koha kur është eliminuar Mehmet Shehu dhe klani i tij. Filmi rrëfen historinë e një funksionari të lartë të Sigurimit, i cili pret fundin, ashtu si edhe ai ka përgatitur të të tjerëve.

QKK informon se brenda vitit që vjen pritet të shfaqet edhe premiera e filmit “Amsterdam Ekspres” me regji të Fatmir Koçit. Ky film ka përfunduar xhirimet e bëra në Amsterdam dhe Tiranë. Në qendër të këtij filmi, me skenar po të Koçit, është dashuria e pamundur. Ajo rrëfen historinë e një të riu shqiptar që ëndërron një të ardhme më të mirë për veten e tij dhe këtë mendon se do ta gjejë në Angli. Është kjo historia e dashurisë së një emigranti në Londër, i cili ka mbetur mes dy dashurive dhe dy vendeve, Londër dhe Tiranë.

Po brenda vitit 2014-të pritet të shfaqet për publikun premiera e filmit “Bota “ të Iris Elezit, e cila fitoi vitin që shkoi një pjesë të financimit për filmin e saj nga “EUROIMAGE”.

Buxhetet kanë rrezikuar këto dy vitet e fundit projektet e reja filmike të mbështetura nga Qendra Kombëtare Kinematografike. Buxheti i viti 2013 për QKK sërish ka qënë 70 milionë lekë të reja, njëlloj si një vit më parë. QKK përballë këtij buxheti duket se ka jo pak të vështirë që të përballojë projektet e një viti Mbështetja për filmat nga QKK është minimale me rreth 15 milion lek për çdo projket, ndërkohë që pjesa tjetër duhet të sigurohet nga bashkëprodhimi. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin